2026-ншы йыл эл басшымыз Владимир Путин мен Россия Халкларынынъ Бирлик йылы деп токтастырылган. Сол официаллы статус артында не зат бар экен? Авылдастынъ маданиятын билмеге мырсат па? Ортак тарихке сый ма? Яде болса, бу аьлиги замандагы яшав шакырувларына явап беруьв эм коьпмиллетли элдинъ тыпаклыгын беркитуьв ме экен?..
Сондай бир неше соравга явап алар ниет пен биз Ногай районымыздынъ орталыгы, халкымыздынъ маданият эм политикалык орталыгы Терекли-Мектеб авыл орамына шыгып, алдымызга карсы шыккан аьдемлерге:
– Сиз уьстимиздеги йылдан не зат куьтесиз, бу йыл кайдай янъылыклар болар деп ойлайсыз? – деген соравды бердик. Соравга явап берген аьдемлер оьзлерининъ толы атларын айтканды суьймедилер, сонынъ уьшин атларынынъ яде тукымларынынъ биринши аьрибин язамыз.
Согыс спецоперациясынынъ катнасувшысы Р. берген соравга булай яваплады:
– Россия Халкларынынъ Бирлик йылы
– элди ишиннен осаллатувга каратылган явдынъ кир ниетине каты явап. Элимизге шапкан явга карсылыкта бирликти коьрсетеди. Бу куьнлерде алдышылыкта – туьрли миллетли, туьрли тиллерде соьйлейтаган аьдемлер, ама олар явга бир ниети мен карайдылар, енъуьвге ымтылыслары да патшалыктынъ тыпаклыгын эм бирлигин коьрсетеди.
Биз оьктемсимеге эм оьсип келетаган несилге ийги асабалык калдырып болатаган болсак, аьр кайсы йыл да пайдалы оьтти деп айтпага боламыз.
Ногай районымыздынъ мектеб окытувшысы Э.Ш.: – Бу йылда бизге аз мырсатлар берилмейди, бизим алдымызда оьз ойымыз бан боьлиспеге кенъ майданлар ашыладылар.
2026-ншы йыл тек эсап беруьв шаралардынъ озувы ман битип калмай, аьр бир аьдемге пайдалы болып оьтсин. Бу йыл ишинде яшавга шыгарылаяк аьр бир билимлендируьв проект эм волонтерлык программалар элдинъ баьри гражданларына да анъламлы эм аьдет баалыкларды саклавга амаллар берсинлер.
Карашай-Шеркеш педагогикалык университетининъ студенти А.
– Бу йылдан не зат куьтемен? Энъ бириншилей, мектеб программасында Россия халклардынъ тиллери бойынша негизли курслар болаяк деген хабар бар, сол мени суьйинтеди.
Олай дегеним, аьр бир республикада яшайтаган туьрли миллетли халк бир-бирисининъ маданиятын уьйренеек, янындагы авылдасынынъ тарихи мен танысаяк, ол ким экенин терен билмеге амалы болаяк. Бирлик деген тек баспа билдируьвлерде язылган соьз болмай, тири катнас болса, бу
йыл сога йол ашса, бек ийги болар эди. Сога мен бек сенемен…
Г.Курганова.
