«Енъуьв поездин» коьргенде, Уллы Аталык согысынынъ кайгылы тарихининъ суьврети коьз алдынъа келеди. Уьстимиздеги йылдынъ казан айынынъ 12-нши куьнинде Кизляр каласынынъ шойын йол вокзалынынъ пер-
ронында юретаган выставкады йыйылганлар шатлыклы аьлде йолыктылар. Йыйылганлар алдында Кизляр администрация аькимбасынынъ биринши орынбасары Айгум Ногаев, ДР Халк Йыйынынынъ депутаты Анна Безрукова эм Дагестан Республикасы бойынша «Енъуьв волонтерлары» Савлайроссиялык ямагат козгалысынынъ толтырувшы етекшиси Жаният Гусейханова шыгып соьйледилер. Оннан сонъ йыйылганлардынъ он темалар бойынша кепленген вагонларында ерлескен выставкадынъ экспозициялары ман таныспага амаллары болды. Солардынъ есирге туьсуьв эм оккупацияга багысланган биревинде тынышлы яшавшылардынъ бактылары эм концлагерьлерде, аьдем яшап болмастай, аьллери коьрсетилген экспозициялары ерлескен эдилер. Выставка каравшылардынъ
белгилевине коьре, мультимедийлик инсталляция аркалы сол оьзгерислерди терен сезбеге амал берилди. Айырым айтканда, есирге туьскенлердинъ акында хабарлайтаган вагонда болувлары ман, коьплер есирге туьсуьв яде оккупацияды оьткен оьз кардаш-ювыкларынынъ тарихин эслерине туьсирмей болмадылар.
Тарихшилердинъ санавларына коьре, Уллы Аталык согысында есирге туьскен аьскершилерининъ эм яшавшы гражданлардынъ арасында янлары курман болганлардынъ ортак саны 7,4 - 8,7 миллионга ювык болады. Балалардынъ акында айтканда, Нюрнберглик процессининъ макалаларына эм аьлиги замандагы тарих тергевлерине коьре, душпан ман корсаланган ерлеринде немец-фашист башкыншыларынынъ тек зулмылык операциясы тамамында 15-18 мынъ балалар ян бергени акында билдириледи.
Суьвретте: шарадан коьринис.