Йыл сайын увыт айынынъ басында Россия илми куьни байрамшыланады. 1999-ншы йылдынъ тамбыз айында сол заманда РФ Президенти Борис Ельцин байрамлар
календаринде янъы куьн беркиткен. Россия илми куьнин Илми Академиясынынъ 275 йыллыгына келистирип салганлар. Сол да босына тувыл, бу куьннинъ тарих маьнеси айлак терен. Илми Академия Россияда илми излестируьвлерди эм ярыкландырувды оьрлендиретаган биринши патшалык организация болады. Сога коьре, бу байрамды увыт айынынъ 8-нши куьнинде белгилев аьлиги замандагы илми уьш юзйыллыклар артта салынган эм асабалыкка калдырылган аьдетлерди алдыга алып баратаганын коьрсетеди. Соьйтип, бу куьн тек аьлиги заманнынъ аьлимлерининъ уьстинликлерин, ашылувларын белгилеп калмай, олардынъ аьрекетин элимизде илми исининъ биринши булаклары ман байланыстырады, онынъ патшалык маьнелигин эм илми излестируьвининъ уьзилмеслигин коьрсетеди.
Савлай элимиз бойынша Илми куьнинде аьлимлерге конференциялар, семинарлар, слетлар озгарадылар, излестируьвшилердинъ бас етимислери белгиленедилер, янъы ашылувлардынъ эм илми ислердинъ презентациялары оьткериледи. Яслар арасында илми аьрекетининъ таралтувы бойынша ис юритиледи, солардынъ ишинде окувшылар да бар. Оларга викториналар эм конкурслар, мастер-класслар, интеллектуальли ойынлар озгарадылар. Яс аьлимлерге грантлар эм
баргылар тапшырыладылар. Мысалы, робототехникады, ресурслар саклайтаган энергетикады эм баска илмилерди уьйренетаган эм оьрлендиретаган аьлимлер куьбине Россия илми фонды йыл сайын 7 миллион маьнет акша тоьлемеге аьзир. РФ Президентининъ грантын – ай сайын 20 мынъ маьнет акша – ийги окыйтаган эм илми аьрекетинде катнасатаган аьлимлер-студентлер алмага боладылар. Солай ок увыт айынынъ 8-нши куьнинде яс аьлимлерге берилетаган илми
эм инновациялар тармагында Россия Президентининъ баргысынынъ лауреатларын айтадылар. Белгили излестируьвшилер бес миллион акша кебинде тоьлевлер эм баргылар аладылар. Россия илми куьни – яратувшылык, акыллылык эм таьвесилмес амалларынынъ байрамы. Биз аьлимлерге сулыбынъыз артканын, ашылувларынъыз уллы етимислерге берк абыт болганын йораймыз. Сизинъ илмиге суьйиминъиз битпесин, аьр куьн сизге янъы аьлемет уьстинликлер савкатласын.
Гульфира Бекмуратова.