Янъыларда «Шоьл тавысы» республикалык газетасынынъ негизинде «Мен тав анъына алал эдим» деп аталган, газета эм Дагестан Республикасынынъ Язувшылар Союзынынъ ногай секциясы ман уйгынланган ятлав окув шарасы болып озды. Буьгуьнги шара талаплы язувшы Магомед Ахмедовтынъ 70 йыллык
мерекесине багысланган эди. Мунда Ногай районымыздынъ мектеблерининъ окувшылары мерекешидинъ орыс, ногай тилине коьширилген ятлавларын
яттан окыдылар.
Дагестан Республикасы талаплы аьдемлерге бай. Сол санда – шаирлер, артистлер, суьвретшилер, аьлимлер, спортсменлер, авылхозяйство аьрекетшилер… Сол талаплы, оьнерли аьдемлерден болады Магомед Ахмедов та. Магомед Ахмедов – орыс совет эм дагестанлы язувшы, шаир, прозаик, коьшируьвши, критик эм
публицист. 1984-нши йылда СССР Язувшылар Союзына алынган, 2018-нши йылдан алып Россия Язувшылар Союзынынъ сырасында болган, 2004-2023-нши
йыллар – Дагестан Язувшылар Союзынынъ председатели, 2005-нши йылда Дагестаннынъ халк поэти деген атка да тийисли болган, коьплеген баргылардынъ лауреаты да болган…
Ол 1955-нши йылдынъ ноябрь айынынъ 13-нши куьнинде Дагестан Республикасынынъ Гонода авылында дуныяга энген. Ерли мектебте окыган, оннан сонъ Москва каласындагы М.Горький атындагы Литературный институтына окымага туьседи, соны да уьстинликли, йогары белгилерге окып битиреди. Сонда окыган йылларында да талаплы шаир коьп ямагат исин бардырады: студент агитбригадасы ман коьп ерлерде болады. Окувдан сонъ тувган-оьскен ерине кайтып, туьрли йылларда туьрли ис орынында белсенли аьрекетин юриткен. Баьри эткен иси де адабиятты оьрлендируьвге каратылган эди.
Сондай талаплы аьдемнинъ мерекесине багысланып озгарылган шара «Шоьл тавысы» газетасынынъ редакциясына йыйнаган коьплеген окувшылар
шаирдинъ яратувшылыгы ман ийги таныс экенин коьрсетти.
Шарады озгарувдынъ да мырады сол эди – балалар арасында адабиятка, ятлав окувга суьйимди таралтув эм талаплы ятлав окувшыларды аянлав.
Мундай шараларды озгарув бек ийги зат, неге десе окувшылар ятлавды яттан уьйренуьви мен оьзлерининъ тил байлыгын оьстиредилер, тувган тилде художестволык соьздинъ энъ де ийги аьдетлерин оьрлендируьв эм саклав болады.
Бу куьнги шара эки туьрли номинация бойынша озды: ногай эм орыс тилинде М.Ахмедовтынъ поэзиясын окув.
Шарада ортакшылык эткен окувшылар саны йырмадан артык эди. Туьзилисинде газетадынъ бас редакторы Эльмира Кожаева, яваплы секретари Любовь Уразаева, шаир Джамиля Амамбаева, Ногай патшалык театрынынъ куллыкшысы Рамзия Шабанова болып, жюри эсабында ятлав окувшыларга баа бердилер.
Аьр кайсы шара катнасувшысы да ятлавды терен сезим мен, яратувшылыкка аваслыгы ман окыды деп айтпага болады. Шара тамамларына коьре, орыс
тилинде Магомед Ахмедовтынъ ятлавларын окыганлар ишинде: биринши орынга – Раима Курманбаева, экинши орынга – Аиша Сагиндикова, уьшинши орынга – Зарипат Абдулкеримова эм ногай тилинде окыганлар ишиннен: биринши орынга – Залим Бегендиков, экинши орынга – Ислам Нургушиев, уьшинши орынга Дженнет Махмудова тийисли болдылар.
Олардан баска болып, уьстине ярасык кийим кийген окувшы Тамерлан Аджигайтаров та каравшылар коьнъилин коьтергени уьшин грамота эм китап
пен савгаланды. Шара бек ийги коьнъилли аьлде оьтти.
Г.Курганова.
Суьвретте: шара катнасувшылары.