Ногай районымыздынъ халк яратувшылык уьйининъ фойесинде согыс спецоперациясы басланганлы бери токтавсыз шилтерлер согувшы «Неравнодушные сердца» деген волонтерлар куьби мен бу куьнлерге этилген куллыклар, согылган шилтерлер саны аз тувыл. Сол куьптинъ белсенли агзалары ман бизим газетамыздынъ окувшылары аьруьв таныс, неге десе биз, газета куллыкшылары олардынъ аьрекети акында язамыз, элбетте, тийисли аьдемлер. Мине янъыларда да олардынъ куьш салувы ман согыс спецоперациясы оьтетаган ерде аьрекет бардыратаган аьскершилеримизге ас-сув, азыклар, шилтерлер йиберилдилер. Айтып озайык, аьр
кеткен гуманитарлык ярдам бизим согыстагы ясларымызга йылувлык аькетеди, Аталыгымыздынъ кесеги оларга баргандай болады. Ама аьр гуманитарлык
юктинъ кетуьви тынышлардан тувыл. Соны аьзирлев, йыйнав, уйгынлав – аьдемнинъ кыйыны. «Неравнодушные сердца» волонтер куьбининъ етекшиси Зарема Толубаева болады. Ол бу истинъ юруьвине аз куьшин салмайды.
Оьзек те, онынъ оьзининъ билдируьвине коьре, исти ялгыз этуьв баска киретаган зат тувыл. Онынъ янында дайым Нурбике Асанова, Кырымхан эм Айбике Ялманбетовлар, Румия Акбулатова, тагы да авыл еринде ислейтаган хатынкызлар да аз тувыл.
– Тек янъыларда СВО ерине гуманитарлык юкти йибердик, бизим аьскершилерге энъ де керекли – шилтерлер. Соларды аьзирлевге заман эм карыж керек болады. Карыж акында айтатаган болсак, коьп зат халктынъ коьмеги мен болады. Бизде материаллык аьрекетти
Румия Акбулатова юритеди, бар аьр уллы юма куьнинде йыйналатаган куьбимиз де, онынъ аьрекетин Орта Тоьбеден Аминат Арсланова юритеди. Бу куьпте де
юма сайын 10 мынъ маьнеттен артык акша йыйналады, баьриси СВО ерине кетеек ярдамга, юкке шыгарылады, соннан шилтер согув алатлар да алынадылар. Баьримизге де белгили куьз шагы келгени, оннан сонъ кылышын суьйреп, кыс та келеди. Биз йылы ерде ятамыз, асымыз-сувымыз мол, а кырдагы аьскершилеримизде ондай шартлар йок, тек туьслерине энмеге болады.
Сонынъ уьшин, аьли менде мырсат болганнан сонъ, айтайым, оларга йылы ювырканлар, астыларына тоьсемеге калшалар, ятар орын этпеге алатлар керек.
Колымыздан келген коьмегимизди биргелесип этейик. Шилтер согувга да кол етпейтаган заманлар боладылар, уьйлеринде олтыратаган хатын-кызларга да
соьзимди каратаман – Енъуьвге косымынъызды сиз де этинъиз, баска биревдинъ баласы болмайды, сол кырда юрген яслар баьриси де бизики, олардынъ орынында аьр биримиздинъ увылымыз, кызымыз болмага да болады. Ногай районымыздан ызгы кеткен гуманитарлык ярдамды ясларымыз Рахмедзан Манкаев эм Адил Темиржанов тийисли ерине дейим еткердилер.., – дейди ян авырувы ман Зарема мени мен хабарласувында. Онынъ билдируьвине коьре, аьр кайсы заманда гуманитарлык юк кетсе, Терекли-Мектеб авыл аькимбасы Марат Кулунчаков ягыннан коьмек болады. Ол оьзининъ материаллык коьмегин дайым да этеди. Ызгы юкке оьз косымын Тимур Байманбетов та этти.
Эткен ислери савапка язылсын. Аьр кайсы исти де толтырар уьшин кыйын саламыз, сондай яваплы исти юритуьвши «Неравнодушные сердца» куьбининъ куллыкшыларына тек савлыкты, шыдамлыкты йорайман.
Сиз этетаган куллыклар баасыз…
Г.Курганова.
Суьвретте: бир неше шилтер соккан А.Ялманбетова.
