Дагестан Республикасынынъ Аькимбасы Сергей Меликов регионнынъ тенъиз аьрекетине тергев салув уьшин 2026-ншы йылдынъ январь айында туьзилген
Тенъиз советининъ биринши кенъесин озгарды. Бу янъы структура Дагестаннынъ тенъиз аьрекетинде куьш-куватлыгы ман пайдаланувды оьрлентуьвге каратылган.
Кенъести аша берип, регион етекшиси «Сырт – Кубыла» халклар ара коьлик коридорын оьрлентуьвде республикамыздынъ уьйкен стратегиялык маьнелиги барын белгиледи. Онынъ соьзлерине коьре, тенъиз тармагы айырым эс каратувды эм баьри ведомстволар куьшин бириктирмеге керекти талаплайды. Совет аьрекетининъ бас йолы эсабында Махачкала тенъиз савдалав портынынъ оьрленуьви болаяк. Аьлиги заманда юк айланысын арттырув уьшин коьлик инфраструктурасынынъ ортак кулланув йолларын косатаган янъы йол курылысы барады, солай ок тенъиз югин бир коьликтен маьнели орын тутатаган баска коьликке коьшируьв борышын толтыратаган ишки логистика орталагы (сухой порт) салынаягы планланган. Бу соравлар биринши кенъесте уьйкен
маьне берилуьв мен ортага салынып каралды.
Айырым эс каратылды профильли кадрлар аьзирлевге. Орджоникидзе атындагы машиностроение эм сервис колледжи негизинде боьтен де керекли тенъиз
кеспилер бойынша билимлендируьв программалар яшавга шыгарылады. Сергей Меликов билдиргенлей, быйылдынъ апрель айында республикага студентлерге практика оьтуьвге кадалып салынган уьш конструкцияларга (мачта) ел мен толатаган уьйкен калын кумаш кесекли кеме еткерилеек.
Эске салайык,Тенъиз совет сырасына региональлик оькиметининъ эм парламентининъ ваькиллери, ыхтыярсаклав органлар, профильли министерстволар етекшилери, солай тенъиз ягаларынынъ ювыгындагы калалар эм районлар аькимбаслары киргенлер.
Бизим хабаршы.