Терроризмге карсы куьресте макулласув куьни мен байланыста Ногай район орталыгы Терекли-Мектеб авылында сога багысланган митинг болып озды. Беслан калада 2004-нши йылдынъ 1-3-нши сентябрь куьнлеринде болып оьткен сол кайгылы ислерден бери нешаклы заман кетуьвине де карамастан, бизим эслеримизден эм юреклеримизден сол куьнлер бир де таймайды.
Халк яратувшылык уьйининъ алдында озган митингти яшавшыларга, авылдынъ эки де мектеблерининъ окувшыларына каратылган соьзи мен Ногай район администрациясынынъ аькимбасынынъ биринши орынбасары Рашид Шангереев ашты. Оьзининъ шыгып соьйлевинде ол 3-нши сентябрь куьни элимиздинъ аьлиги замандагы тарихинде энъ де кайгылы оьзгерислердинъ бириси болувын айырым белгиледи. Сол куьн патшалыктынъ эм ямагаттынъ зорлыкка, аьдем аьдемди корлавга колдан келген баьри де амаллар ман карсылык этуьв керегин аянлап коьрсетеди.
Митингте солай ок Ногай район хатын-кызлар советининъ председатели, Дагестан Республикасынынъ Ямагат палатасынынъ агзасы Асият Манкаева, Ногай район Ямагат палатасынынъ председатели Эльмурза Саитов, СВО белсенли катнасувшысы, аьлиги заманда демобилизация бойынша уьйине кайтарылган Алимхан Култаев шыгып соьйледилер.  А.Манкаева эм Э.Саитов районымыздынъ оьсип келеяткан яс несиллерине каратылган соьзлеринде дуныяда энъ де аявлы, кишкей, юка эм йинъишке янлы балаларга, ясларга, элимиздинъ баьри яшавшыларына каратылган террористлердинъ йырткыш кыянатлыгын каты айыпладылар. Олар республикамыздынъ калалары Буйнакскта, Каспийскте, Махачкалада эм Кизлярда экстремистлердинъ оьткерген йырткыш ислери эндиги де бизим эсимизден таймайтаганын айтып белгиледилер. Буьгуьнлерде болса, сондай намарт эм пис савытты элимиздинъ яшавшыларына карсы украин националистлери кулланадылар. Сога явап деп биз Тувган Элимизди, тарихимизди, халкымызды, ана тилимизди суьймеге, мектебте ийги окымага борышлымыз.

Асият Манкаева соны ман бирге оьзининъ соьзинде быйыл июнь айында Казахстандагы Алма-Аты каласында Савдуныялык балалар фестивали эсабында халклар ара яс суьвретшилердинъ «Балалар планетасы. Дуныя бояклары» деп аталган конкурсы болып оьткени акында айтты. Сол конкурска бизим районымыздынъ окувшыларынынъ да куллыклары йиберилген эди. Россия суьвретшилер союзынынъ агзасы Мархаба Мусауровадынъ тербияланувшылары сонынъ куллыгында белсен катнасканлар. Бу Савдуныялык фестивалининъ 9 мынъ катнасувшылары арасында 3-нши орынды Кадрия атындагы орта мектебининъ 9-ншы классынынъ окувшысы, Тувган Эли алдында оьз эр борышын баьтир кимик толтырган Аджинияз Акимовтынъ увылы – Рашид Акимов алган. Ога фестивальдинъ 3-нши дережели дипломын шатлыклы аьлде район аькимбасынынъ биринши орынбасары Рашид Шангереев тапшырды.
Оьзининъ соьзинде СВО катнасувшысы Алимхан Култаев СВО катнасувшыларына ярдам этуьвши «Тавлар эстелиги» дагестан регионаллык ямагат организациясынынъ ваькили болатаганын билдирди.
«Буьгуьн биз Беслан каласында яшавлары уьзилген аьдемлердинъ эстелигине бас иймеге йыйылганмыз. Сонда ян бергенлердинъ арасында балалар, окытувшылар, ата-аналар, сол куьн мектебке келген эм соннан уьйлерине кери кайталмаган аьдемлер де болганлар. Мен оьзим де элимизди коршалав ман байланыслы сынавлардан оьткенмен эм аьдем яшавынынъ, тынышлыктынъ эм кавыфсызлыктынъ баасын баскалардан артык анълайман. Ян бергенлерге ярык эстелик болсын! Олардынъ атлары эм бактылары бизим юреклерде оьмирге саклансын, бизим балаларымызга тынышлы таза аспанды эм бир де терроризм кавыфлыгын коьрмесин деп йорайман», – деп белгиледи Алимхан Култаев.
Эстеликли шарада солай ок район орталыгынынъ эки де мектеблерининъ окувшылары ортакшылык эттилер. Кадрия атындагы мектебтинъ окувшысы Раима Курманбаева – «Биз – террорга карсы», А-Х.Джанибеков атындагы мектебининъ окувшысы Камила Курганова – «Беслан балаларына» деген ятлавларды яттан окыдылар.
М-А.Ханов.
Суьвретте: митинг катнасувшылары.