Дагестан Республикасынынъ Аькимбасынынъ исин юритуьвши Федор Щукин «Дагестан куьби» кадрлы программасынынъ кепленуьви бойынша кезекли он катнасувшы ман байыр хабарласувын оьткерди. Бу йол регион аькимбасы ман йолыгыста патшалык етекшилев, билимлендируьв, савлык саклав, энергетика эм спорт тармакларынынъ специалистлери болдылар. Эсинъизге салып озайык, бу проект субъект етекшиси мен яшавга шыгарылган. Бас ниет – уста кеспили специалистлерди аянлав эм ис орынларга ерлестируьв. Проектте катнаспага ниети бар аьдемлердинъ баьрисине де бир ортак борышлар салынадылар: регистрация оьтуьв, видеоэссе, оьз ойы ман боьлисуьв эм ДР Аькимбасынынъ исин толтырувшы ман байыр йолыгыс. Федор Щукин бу катнасувшылар ман – баьриси 9 аьдем эди – хабарласа келип, ой токтас этти эм бу аьдемлер регионды оьрлендирмеге болаяк куьптинъ санына кирдилер. Федор Щукиннинъ белгилевине коьре, буьгуьнги программа катнасувшылары шынты исти суьйген аьдемлер экенин коьрди, солай болганда, ол аьрекетшилерди сайлавда дурыс йорыкты алган болады. – Аьли уьшин проектимиз тек онъына барады, келеекте де бу ийги аьдет болып, яшавга киргизбеге ниет этиледи. Туьрли регионларда ис аьрекетти бардырып, ис сулыбын байыткан ясларымыз регионды оьрлендируьвде ортакшылык этпеге мыратлары бар экенин бу проект бизге коьрсетти, бизим борышымыз болса, олардынъ аьр бирисин тынълап, тийисли карар алув, – дейди Федор Щукин. Буьгуьнлерге белгиленген шарада ортакшылык этпеге ниетим бар аьдемлер саны доьрт мынъ ярымнан да артып барады. Шарада катнасар уьшин – «мен аьруьв эр киси, ислемеге де ниетип бар» дегеннен пайда йок, ис аьрекеттинъ тамамы болмага керек, сонынъ уьшин, ис орынга ерлесер уьшин, куллык алмага ниети бар аьдем оьзининъ ис сулыбын коьрсетпеге эм тийисли тармак бойынша белгиленген приоритетлерди белгилемеге керек болады. Оьткен юмадынъ тамамларын келтиретаган болсак, проект бойынша 4 аьдем кадрлы резервке киргенлер эм ювык арада ис орынларга беркитилееклер. Йолыгыстынъ ызында Федор Щукин: – Бизим борышымыз – ыршуветсиз, «аькимлердинъ» теллер согувы болмай, тийисли, билимли специалистлерди аянлав эм соларды ис орынларга ерлестируьв. Сол айырган аьдемлердинъ Аталыкты оьрлендируьвге мыратлары эм таза ниетлери болсын, – деди. Бу проекттинъ яшавга шыгарылувы регион етекшисининъ исин толтырувшыдынъ оьзининъ байыр тергеви астында турады.