Кайбиримиз, согыс спецоперациясы битип, савлай Элимизге енъуьв келер деп сенемиз. Сол енъуьвди Россия Савытлы Куьшлерининъ аьскершилери ювыклатадылар. Олардынъ сырасында бизим йигитлеримиз – дагестанлылар коьп. Дагестан Республикасынынъ Ногай районынынъ Батыр-Мурза авылынынъ яшавшысы Адилхан Зулумхан увылы Абдуразаков «За боевые отличия» медали мен савгаланган.
Ердесимиз бу авылдынъ орамларында ойнап, тенълери мен мектебке барып, оьскен. Мектебти битирип, Санкт-Петербург каласында Н.А.Щелоков атындагы милиция Академиясында окувын бардырган.
Сонъында – Москва каласында эр борышын толтырув. Армиядан сонъ Адилхан Армавир каласына коьширилген эм сонда Россия Коршалав министерствосы ман СВО еринде куллык этуьв уьшин контрактка кол баскан.
Бир йыл узагында Адилхан Абдуразаков СВО еринде куллык этеди, сол йылдынъ ишинде етискен уьстинликлери уьшин патшалык баргыларына тийисли болган. Янъыларда аьскерши «За боевые отличия» медалин алды. Куллык этетаган боьликтинъ етекшилеви мен ол «За отвагу» и «За воинскую доблесть»
медальлерине коьрсетилген.
Адилхан Абдуразаков Курская областинде ислейди, оьз йолдаслары ман Россия ерлерин явдан босатып келеди. 2025-нши йылдынъ курал айыннан алып Курская областининъ Глушковский районынынъ Теткино авылында коршалав исинде катнаскан, Украина эм Россия япсарында «Бутырская» орманлыгында коршалав курылысларын туьзген.
2025-нши йылдынъ тамбыз айынынъ 18-нши куьнинде Теткино авылынынъ янында туратаган позициясына бараяткан заманда FPV-дронлардынъ атылысларынынъ астына туьскен, яраланган. Куьшли авырувына карамастан, позицияга карап барган. Ерине етип, оьзине биринши ярдам эткен, эм баска аьскершилер келгенше, алдына салынган борышларын толтырган. Сонъында госпитальге кеткен. Адилхан Абдуразаков эм онынъ йолдаслары явды киргизбегенлер Теткино авылына. Етекшилери Адилханды оьз мырадына етисип болатаган, алдына салынган борышларды яваплылык пан толтыратаган аьскерши деп белгилейдилер. Коллективте ердесимиз сыйабырай казанган, ол – согыс аьрекетининъ ветераны.
Бу куьнлерде Адилхан Абдуразаков СВО еринде оьз эр борышын толтырады, уьйде оны ата-анасы, хатыны, кардаш-тувганлары куьтедилер. Сондай коьтергишлев аьскершиге – маьнели эм керекли. Соьйтип ол оьзининъ бас мырадына – енъуьвди аькелуьв уьшин куьш салады. Биз оьзимиздинъ ердесимиз бен оьктемсиймиз, уьйге аман-эсен келгенин суьемиз.
Гульфира Бекмуратова.
Суьвретте: А.Абдуразаков.
