Согыслар эм согыс операциялар оьткен заманларда Элге суьйим тек дав майданлардагы йигитликлерде тувыл, Аталык коршалавшыларды коьтергишлевге, оларга ярдам этуьвге каратылган биргелес исте де коьринеди. Уллы Аталык согысы йылларында савлай совет халкы «Баьри зат фронка, баьри зат Енъуьв уьшин» деген шакырув астында ислеген. А бу куьнлерде Россиядынъ яшавшылары, алдышылыктагы йигитлерге коьмек йиберип, Енъуьвге оьз уьлисин косадылар. Сондай болып Енъуьвге уьлисин Ногай районындагы «Неравнодушные сердца» волонтерлар куьбининъ агзалары да косадылар.
Олар согыс спецоперациясы озып турган ерге гуманитарлык юклер йибередилер. Бу куьптинъ хатынларынынъ йылы, каьр шегуьвши коллары ман бизим баьтирлерге посылкалар йыйналадылар. Бизим СВО катнасувшыларымыз тувган ериннен азыклар, дарманлар, йылы кийимлер эм ясырынмага шилтерлер алып, оьзлерин ялгыз тувыл, олардынъ артында сенмеге болган халкы барын сезедилер эм Енъуьв бизики болаягына сенимлери оьседи. Халкы ман коьтергишленген аьскер явга енъилмес! «Неравнодушные сердца» волонтерлар куьби уьстимиздеги 2025-нши йылдынъ увыт айыннан алып аьрекетлейди. Онда Ногай районынынъ тогыз авылынынъ ваькиллери киреди, айтпага, Терекли-Мектеб, Нариман, Кумлы, Кара-Су, Батыр-Мурза, Червленные-Буруны, Карагас, Орта-Тоьбе эм Куьнбатар. Он айдынъ ишинде белгиленген волонтерлар куьби Зарема Толубаевадынъ етекшилиги мен коьп кайта гуманитарлык юк йыйнап согыс спецоперациясы озган ерге йибергенлер. Аьскер куллыкшыларына гуманитарлык ярдам эткени уьшин озган ай «Неравнодушные сердца» куьби 205- нши айырым гвардейский мотострелковый
Казак бригадасынынъ етекшилевиннен Разылык хат алган.
– Биз сизинъ арымай-талмай бардырган намыслы исинъизди, йогары яваплылыгынъызды баалаймыз. Сизи мен этилинген ис аркалы бизим аьскер куллыкшыларынынъ биргелесуьви эм ян коьнъили боьтен де беркиди, сол уьстинликке эм бизим боьликтинъ алдына салынган борышларды заманы ман толтырувга келтирер, – деп язылады Разылык хатта.
Бизим СВО катнасувшыларымызга посылкалар йыйнавда савлай район яшавшылары катнасады. Олар керекли затларды алар уьшин акша йыйнайдылар. Хатынлар уста коллары ман катлама, боьреклер, таьтли зияпетлер писиредилер, ынъкал эм баска ногай миллет аслар аьзирлейдилер. Олар бизим коршалавшыларга тувган ерининъ йылувы, аналар эм хатынлардынъ каьр шегуьви, балалардынъ суьйими еткенин суьедилер. Олар баьри де, солардынъ сырасында «Неравнодушные сердца» куьбининъ агзалары да суьйим эм каьр шегуьв йигитлеримизге куьш
береегине эм Енъуьвге сенимин оьстиреегине сенедилер.
Янъыларда, караша айынынъ 15-нши куьнинде, «Неравнодушные сердца» волонтерлар куьби район яшавшыларынынъ коьтергишлев этуьви мен СВО озып турган ерге гуманитарлык юк йиберди.
– Доьрт куьннинъ ишинде заьлимдей акша йыйналды. Манаповлардынъ аьелиннен 10 мынъ маьнет акша туьсти, олардынъ ювыгы Мурза Даутов бу куьнлерде СВО барысында Элининъ кызыксынувларын коршалайды. Куьнбатар авылынынъ аькимбасы Замид Яриков 50 мынъ маьнет акша айырды.
Тез арада керек болган затлар сатылып алынды эм писирилди. Ол – дарманлар, йылы кийимлер, туьрли миллет аслары, зияпетлер, ясылшалар, емислер эм коьп баскалар. Аьдемлер банкаларга тузланган ясылшалар, кайнатылган секерли емислер, ювырканлар, ястыклар аькелдилер. Олар уьйинде болган баьри зат пан да йигитлеримиз бен боьлискиси келдилер. Куьнбатар авылынынъ яслары бес койдынъ этин бердилер. Бу баьри заттан баскалай йигитлеримизге сегиз ясырынатаган шилтерлер, 20 метр балык ыслайтаган кармак, (оны Крестьяновка авылыннан балыкшылар бердилер). Эки газель коьлик толып калды. Бу гуманитарлык югин йыйнавда Коясыл авылынынъ «Бирлик» эм Махмуд-Мектеб авылыннан волонтерлар куьплери ортакшылык эттилер, – деп билдиредилер «Неравнодушные сердца» куьбининъ агзалары.
– Бизим куьптинъ катнасувшылары гуманитарлык юк йыйнавда эм оны Аталык коршалавшыларына йиберуьвинде катнаскан баьрине де разылыгын билдиреди. Уьйкен савбол айтамыз Куьнбатар авылыннан Адил Махмудов пан Якуб Менглиязовка. Олар юкти СВО озып турган ерге элтеп еткергенлер. Ростов каласында тагы да бир коьликти бир неше тонна сув ман толтырып айдатып аькеткенлер. Адил эм Якубтынъ инилери СВО барысында Эли уьшин оьз янларын бергенлер. Соьйтип олардынъ эстелигине агалары озган йылдынъ караша айында да СВО катнасувшыларына гуманитарлык юк еткергенлер, – деп хабарлайды белгиленген куьбининъ катнасувшысы, Куьнбатар авыл яшавшысы Хаирниса Нурлыбаева.
СВО катнасувшысы, бизим ердесимиз Рустам Магомедов эм онынъ аьскер йолдаслары Ногай район яшавшыларына, «Неравнодушные сердца» волонтерлар куьбининъ катнасувшыларына эм Адил Махмудов пан Якуб Менглиязовка эткен коьмегине уьйкен разылыгын билдиредилер. Коьлик ерине еткен куьн Рустам Магомедов эм онынъ экипажы борыш толтырувда болган, сонынъ уьшин онынъ командири посылкаларды алмага келген. Сол куьн посылкалар бизим 5 ердесимизге эм олардынъ янындагы йолдасларына еткерилди. Коркынышты билмеген ердеслеримиз биз эм бизим таза аспанымыз уьшин онда явды согадылар, а мунда биз олар уьшин каьр шегемиз. Тек соьйтип, тылдынъ коьтергишлеви эм
йигитлеримиздинъ баьтирлерлиги мен Енъуьв келер!
Нурият Кожаева.
Суьвретте: А.Махдудов, Я.Менглиязов эм СВО катнасувшысы Р.Абдулгапов.