22 июнь – кайгыга, баьтирликке эм ян авырувга толган куьн. Бу куьн миллионлаган яшавларды кыскарткан, элимиздинъ аьдемлерининъ юреклеринде бир де битпес
яра эм ыз калдырган Уллы Аталык согысы басланган. 1418 куьнге созылган бу кавга.
Онынъ акында эсти дайымларга саклав – бизим борыш. Аталыгын коршалаган, элинде яде ят ерде янын берген аьр бир аьскершидинъ аты белгили болмага тийисли.
Эстеликли куьнге багысланып, А-Х.Джанибеков атындагы мектебиндеги язгы лагеринде линейка уйгынланды. Шара Россия гимни мен басланды, сонъ лагерьдинъ
баьри отрядларынынъ балалары, янлары курман болган аьскершилердинъ эстелигине сый этип, бир такыйка уьндемей токтадылар. Оннан сонъ баьрине де белгили
Юрий Левитаннынъ, Уллы Аталык согысы басланганын билдирген, сеси йыйылганларды ойлары ман 1941-нши йылдынъ кайгылы танъына коьширди.
Шара юритуьвши окувшылар Малика Алимгереева эм Эмир Каракаев бу эстеликли куьнлерди эсте саклав бек маьнели экенин белгиледилер. Аманламада балалар согыс, эрклик, баьтирлик акында ятлавлар яттан айттылар. Олардынъ аьр бириси сол кайгылы куьнлердинъ ян авырувын оьз юреклериннен оьткергенлей, шалысып, йыйылганларды сукландырдылар. Сумайя Нукаева анадынъ акында балладады окыды, анадынъ юреги йыллар оьтсе де, авырыйды, заман ман онынъ ярасы битпейди. Анадынъ ян авырувын сыдыралар ман сездирип болган кызалак, йыйылганлардынъ коьзясларын суьрттирди. Амира Исмаилова Муса Джалильдинъ «Чулочки»,
София Мамаева «Победный Май», Айзана Шугаипова «Ветер войны» ятлавларын аьр биревдинъ ян сезимлерин козгап окыдылар.
Линейкадынъ оьзеги болды «Орлята России» отрядынынъ кызларынынъ биюви. Олар уллы шаир Расул Гамзатовтынъ соьзлерине язылган «Турналар» йыры ман
ярасык биюв коьрсеттилер. Ап-ак кийимлер кийген кызлар аьскершилердинъ янларын коькке аькеткен турналарды коьрсеттилер.
Кайгылы куьнге багысланган линейка бек ийги аьлде оьтти, балалардынъ соьйтип шалысувы, яваплылы каравы олардынъ тарихимизге, янын берген аьскершилердинъ эм баьри баьтирлердинъ эстелигине уьйкен сый этуьвин коьрсетти.
Нурият Кожаева.
Суьвретте: кызлар бийиген мезгил.