Баьтирлер Ерде тувадылар, олар бизим касымызда яшайдылар. Ол – орамда дослары ман ойнап турган конъысы кеде. Ол – кишкей мысыкты ийтлерден куткарган окувшы. Олар – СВО ерине кетип, куьшин де, янын да аямайтаган бизим йигитлер. Солай, олар ерде тувадылар, сонъында олардынъ янлары, ак маьлеклердей болып, аспанга коьтериледилер – оьз борышларын толтырып, Атылыгы уьшин ян берген сонъ. Таза аспаннынъ астында яшайтаганлар уьшин. Балаларымыз уьйге кайтып келсинлер деп тилек тилеген аналар уьшин.
Денибек Каирбек увылы Бекмурзаев специальли согыс операциясында бу йылдынъ канътар айында ян берген. Ол Нефтекум районынынъ Коясыл авылында уьйкен атайы эм тетеси касында тукым мезарында койылган. Айтадылар, Денибектинъ тамыры дворянлардан кетеди, сога коьре Бекмурзаевлердинъ «Мурза - тайпа» оьлиги авылда айырым турады.
Денибек Ачикулак авылында тувган, ога бес яс толганда, ата-анасы Нефтекумск каласына коьшкенлер. Мунда ол мектебти битирген, эр борышын толтырмага йолланган. Армия сырасында Денибек Бекмурзаев Ростов областинде куллык эткен, Зерноград каласында. Сонъында яс Ростов-на-Дону каласына коьшеди. Ата-анасынынъ эскеруьвлерине коьре, ол бек суьетаган болган бу калады. Коьп ерлерде ислемеге туьсти Денибекке – Магадан, Уфа, Буденновск, Краснодар крайы, Ростов области.
Специальли согыс операциясы басланганнан алып Денибектинъ эки агалы-инилери Аталыкты коршаламага кеткен эди. 2025-нши йылдынъ увыт айында Денибек те контрактка кол басты, сол заманга кардашларынынъ бириси оьлген, экиншиси – сес-хабарсыз йойытылган эди. Денибек ВДВ сырасына, штурмовой отрядка туьсти, разведкада ефрейтор болып куллык этип баслады. Бас деп позывнойы «Бек» эди, сонъында «Каир» деп алды. Луганск областинде согыс борышларын толтырып турган мезгилде аьскершилер атылатаган алатка карсы келдилер. Оьзи каты яраланган болса да, аьлсиз командирин коьтерип шыгарган Денибек. Госпитальде эмленген сонъ, яс уьйине отпускка кайтады. Кардаш-тувганларын, ата-анасын коьрип, Ростовка кетеди, мунда оны суьйикли кызы карап турган.
Уьйде кайдай аьруьв болса да, аьскерши оьз йолдасларын ойлайды, кайтпага алгасайды. Отпусктан сонъ Денибек Запорожьеге, сонъында Луганск ерине йибериледи. Аьскершилерди Покровск каласына согыс борышын толтырмага аьзирлейдилер. Бу ердеги согысувлар айлак авыр эди, яслар карагыс айынынъ 19-ншы куьниннен алып канътар айынынъ 4-нши куьнине дейим коршалавды ыслаганлар. Баьриси де яраланган эди. Денибектинъ аягы каты яраланган, болса да, яслар согысувды токтатпайдылар. Канътар айдынъ 6-ншы куьнинде ясларга кайтынъыз деген буйырык келеди, олардынъ алдына эвакуационлык куьби де шыгады. Уьш аьдем болып, Денибек алар бизим позицияларга карап юредилер, бу ерде олар «Баба Яга» дроннынъ атылувына туьседилер. Оькинишке, кеделерди куткармага амал йок эди. Денибек Бекмурзаевтинъ мейитин авылга увыт айынынъ 9-ншы куьнинде аькелдилер.
Несиллер арасындагы байланыслар уьзилмейдилер. Бизим халкымызда аьдет бар – тувган балага ата-бабаларынынъ атын атайдылар. Денибек уьйкен атайынынъ атын юритетаган болган, ол Уллы Аталык согысына кетип, сес-хабарсыз йок болган. Коясыл авылында салынган эстеликте уьйкен Денибек Бекмурзаевтинъ аты язылган. Оьктемлик пен юритетаган эди Денибек уьйкен атайынынъ атын. Оькинишке, ол да янын согыста берди. Атайынынъ аты ман бирге Денибекке онынъ йигерлиги де коьшкен болган. Быйыл ога 30 яс толаяк эди. Баьриси де Денибекти эсинде саклайдылар, танъ, маскарашыл, баскаларга ярдам этпеге аьзир аьдем деп эскередилер.
Денибек Каирбек увылы Бекмурзаев Йигитлик ордени мен (оьлгеннен сонъ) савгаланган. Биз онынъ ата-анасы Каирбек Заурбек увылына эм Саниет Бегали кызына бассавлык йораймыз. Денибек оьз борышын толтырган эм халкынынъ, Уллы Россиядынъ эсинде дайымларга калган.
Г.Бекмуратова.
Суьвретте: Д.Бекмурзаев.