Ногай район администрациясында коллегия йыйыны болып оьткен. Шарада сонынъ катнасувшылары Ногай район Территориаллык сайлав комиссиясынынъ алдыдагы Россия Федерациясынынъ Государстволык Думасына, Дагестан Республикасынынъ Халк Йыйынына депутатларды сайлавлар, соны ман бирге ерли сайлавларды оьткеруьвге аьзирлиги эм келип турган 2026-2027-нши янъы окув йылына районнынъ билимлендируьв учреждениелерининъ аьзирлиги акында соравларды ойластылар. Коллегияда Ногай район ТИК председатели Расул Боранбаев шыгып соьйлеген. Онынъ билдируьви бойынша район еринде территориаллык сайлав комиссиясы ман 17 участок сайлав комиссиялары уйгынланганлар. Бесинши шакырувдынъ авыл депутатлар йыйынларына косымша сайлавларды оьткеруьв бойынша кандидатларды коьрсетуьв акында документлерди район территориаллык сайлав комиссиясы быйылдынъ 2-нши августына дейим алган. Быйыл райондагы ерли сайлавлар «сельсовет Коктюбинский» СП МО еринде (№ 2 бир мандатлы округ), «сельсовет Карасувский» СП МО еринде (№ 2 бир мандатлы округ), «сельсовет Карагасский» СП МО еринде (№ 1 бир мандатлы округ), «сельсовет Ортатюбинский» СП МО еринде (№ 3 эм № 11 бир мандатлы округлар) болып оьтееклер. Р.Боранбаевтинъ айтувы ман, аьлиги заманда бир неше уйгынлав шаралары оьткерилип турады. Айтпага, сайлав участокларынынъ саны эм солардынъ япсарлары аьр бир авыл еринде сайлавшылардынъ саны акында билдируьвлерди эсапка алувы ман (ерли администрациялардынъ аькимбаслары ман макулласув негизинде) токтастырылады. Сайлавшылар тукымлары регистрационлык эсаплав органларынынъ билдируьвлери негизинде кепленедилер. ТИК председатели солай ок сайлавшыларды уьй-уьйлерине кирип белгилев куллыгы план бойынша бардырылаягы, тавыслав оьтеек баьри де меканлар тергелгени эм федераллык законодательствосынынъ талаплавларына келисли экени эсапка алынганы эм баска соравлар акында хабарлады. Коллегияда районнынъ ортакбилимлендируьв учреждениелерининъ янъы басланатаган окув йылына аьзирлиги акында билимлендируьв боьлигининъ начальниги Амирхан Межитов шыгып соьйледи. (Онынъ докладын бу номерде окымага боласыз).

 М-А.Ханов.