Ногай районымыздынъ Карагас авыл орта мектебиннен футболист кызлар куьби элимиздинъ бас каласы Москвага да етип, «Салют» ФСК майданында оьз куьшлерин сынап кайттылар. Бу йол олар, сегиз энъ де ийги деген футбол куьплерининъ санында, бесинши болдылар.
Олар ман таныстырып озайым. Ногайымнынъ ярасыклы шоьлининъ авылы Карагаста оьсетаган кызлардан туьзилген футболшылар куьби буьгуьн атларын ийгилик пен айттырдылар. Олар куьн сайын аста-аста бу уьстинликке етисип келедилер. Аямайды балалардынъ тербиясы уьшин оьз куьшин окытувшы Адильхан Сагынбек увылы Менласанов та. Окытувшыдынъ атын да коьп ерлерде аьруьв ягыннан айтылып эситемен. Ол шынтысы ман да яс несилди тербияламага шалысады, сол касиети де босына тувыл, аьли ол етискен бийиклик коьп зат акында айтады. Энъ де баслап, куллыксуьерлик, кесписине алаллыгын коьремиз.
Авыл мектебинде футбол ман каьрлеген окувшы кызлар куьбининъ ийги аты оьткен йылдынъ язлыгында шыкты, олар Дагестан Республикасынынъ мектеб футбол лигасында ортакшылык этип, финал шеригине де етип, енъилген эдилер, бу йыл сол ок шарада олар оьзлерининъ ийги аьзирлигин коьрсеткенлер, биринши орын олардыкы эди. Оннан сонъ олар савгалы орынларды бийлеп турдылар, артта: Ростов областининъ Волгодонск каласында ойын, уьстимиздеги йылдынъ курал айында Дагестаннынъ мектеб футбол лигасында – тагы да биринши орын. Бу ойынларда катнасув бизим кызлар куьбине Москвадагы ойынга аьзирлик те болды эм сулып та берди.
Уьстимиздеги йылдынъ кырк кийик айынынъ 21–23-нши куьнлеринде «Салют» ФСК майданында (Москва каласында) оьткен балалар каралды футболынынъ VIII Савлайроссиялык фестивали элимиздинъ 50 туьрли регионыннан 60 ойнавшы куьп ортакшылык этти. Мунда да кызлар куьби бек ийги ойынды коьрсеттилер, ойыннынъ финалынынъ шеригине дейим де етти, тек финалга шыкпага буйырмады, ама сулып байыды, сол куьн турнирде ортакшылык эткен белгили аьдемлер: олимпия чемпионы Ирина Роднина, Россия йыйылма куьбининъ алдынгы агзасы Денис Глушаков эм «Матч ТВ» телеканалынынъ комментаторы Константин Генич пан танысып, суьвретке туьспеге амал да болды.
Москва каласында озган футбол фестивалинде ортакшылык этпеге амалы болган кызлар, оларды сол уьстинликке етиссин деп куьш салган окытувшысы, насихатшысы Адильхан Сагынбек увылы акында, оьзлерининъ социаллык тармакларында коьп ийги соьзлер язадылар. Солардынъ биревин сизге келтирейим.
– Адильхан Сагынбек увылы бизге уьйкен йол ашты, биз оны ман эм онынъ бизге сеними мен уьйкен дережели спорт майданына шыктык эм сонда оьзимиздинъ сулыбымызды да байыттык, алтын лига санына да кирдик. Сол ойын бойынша бизди колтыклаган ювыкларымыз да бар эдилер, олардынъ да бизге ярдамы бек уьйкен куьш берди. Ойыннан сонъ, Адильхан Сагынбек увылы бизге Кызыл майданды да коьрсетти, Уьйкен театрда да болдык, кеспили хоккей ойынынын да карап кайттык. Сол затлар баьриси де кызыклы эди, бу озгарган заман бизим эслеримизде калаяк. Сонынъ уьшин оьз тренеримизге уьйкен разылыгымызды билдиремиз, – дейди Хадиджа Заракаева.
Бу футбол куьбининъ санында 10 кыз бар: Хадиджа Заракаева, Наира Кошанова, Сафина Койлубаева, Асиет Озаралиева, Аиша Аджигельдиева, Рабиа Елгишиева, Райана Ярболдиева, Насият Аджиева, Дженнет Махмудова, Айшат Эдильбаева. Сол кызлардынъ етеви негизли куьпте ойнайдылар, калган уьшеви авыстырувшылар. Аьр кайсысы да куьптинъ куватлы кесеги болады.
Алдыда кызлар куьбине эм онынъ тренери Адильхан Сагынбек увылына тек уьстинликлерди йорайман.
Айтылсын атынъыз тек ийгилик пен!
Галима Сагиндикова, РФ Журналистлер союзынынъ агзасы.
Суьвретте: футболшы кызлар куьби Москва спорт майданында.