Уьстимиздеги йылдынъ караша айынынъ ызгы куьнлеринде Ногай районымыздынъ Куьнбатар авылында бир аьлемет йылы йолыгыс озгарылды. Бу куьн мунда оьз йылувлыгын дайым бермеге аьзир аьдемлерди хош коьрип алдылар. Олар – бизим халкымыздынъ алал кызлары эм йигитлери, согыс спецоперациясы басланганлы халкымыз арасында аьруьв таныс болган «Неравнодушные сердца» волонтер куьбининъ агзалары. Бу куьп тек район орталыгында аьрекет бардырып калмайды, олардынъ агзалары авыл ерлеринде де куллыклар этедилер. Баьри этилетаган ислер де СВО уьшин, сонда юрген йигитлеримизге уьй йылувлыгын йиберер ниет пен этиледи.
Ногай районымыздынъ Куьнбатар авылында аьдемлердинъ коьнъилине шатлык эндирген йолыгысты авыл маданият уьйининъ етекшиси С.Мусаева, методисти С.Касбулатова эм ерли китапхана етекшиси С.Шабазгереева уйгынлап, озгардылар.
Бу куьн мунда йыйылган халк саны аз тувыл эди: Ногай район авылларында аьрекет этетаган волонтер куьплерининъ белсенли хатынлары, согыс спецоперация катнасувшыларынынъ ювык кардашлары, ерли етекши органларынынъ агзалары, мектеб, балалар бавынынъ, КЦСОН куллыкшылары эм оларга разы болган авыл яшавшылары.
Йолыгыс барысында коьп ийги соьзлер волонтер куьбининъ агзаларына айтылдылар. Элбетте, олар этетаган куллыкларга баа беруьв бек кыйын. Ол инсанлар эткенлери уьшин бир кыйын ак та алмасалар да, баьри куьшлерин де Россия элининъ явды енъуьвине саладылар. Сол согыс майданда куллык этетаган йигитлеримизге оьзлерининъ тылдагы ислери мен куьш бередилер.
Йолыгыста оларга уьйкен разылык соьзлери мен авыл яшавшылары Рамазан Кошекбаев, Маутали Куванаев, мектеб етекшиси Тамара Бариева шыгып соьйледилер.
Баьрининъ де юрек сезимлерин козгады согыс спецоперациясынынъ катнасувшыларынынъ ювыкларынынъ соьзлери. Авыл еринде тувып-оьскен,
йигитлик орденининъ иеси (оьлгеннен сонъ) Джалил Махмудовтынъ агасы Адил Батырхан увылы, бу куьнлерде СВО катнасувшысы, эр йигит Джалиль Шекировтынъ анасы Арапа Халий кызы оьз разылыкларын билдирип, иниси эм увылы акында хабарладылар.
Солай ок Орта-Тоьбе авылыннан конак болып келген, эки увылы да согыс спецоперациясында катнасувшлары болган эм биреви бу куьнлерде де Россия кызыксынувларын яклап юрген баьтирлердинъ анасы Сапуэт Даутова, Червленные Буруны авылыннан Феруза Аманакаева эм баскалар шыгып
соьйледилер. СВО катнасувшыларынъ ювыкларынынъ баьрисининъ де соьзлери акыйкатлык пан, юреклеринде авырувлары ман айтылган эдилер, аьр кайсысы да бу куьнлерде этилетаган куллыклардынъ иелерине уьйкен муьсиревли савболсын ман айтылдылар.
Оьзек те, оьзининъ басыннан оьткерген аьдем, тынышлык болсын, кыйынлык болсын, аьруьв анълайды, неге десе ол соны оьзи сезген. Бу куьн айырым эс бу истинъ басында турганларга этилди. Сол санда Динислам Сагиндиков пан Альмира Акмурзаева да бар эдилер. Олар биринши болып, авыл ериннен согыс спецоперациясы озып турган ерге гуманитарлык юкти еткергенлер.
Аьли авылда волонтерлык исти Сабанали мен Хаирниса Нурлубаевлер, Увылбийке Аджигайтарова, Айбике Куванаева, Тансылув Канмурзаева, Касират Койлакаева, Курманбике Мамутова эм баска коьплер толтырадылар.
Оьзек те, СВО ерине азыктуьликти, керекли затларды аьзирлев енъил тувыл, оны ерине еткеруьв боьтен де авыр, ама соны да толтыратаганлар бар. Уьйкен сый
СВО еринде йигитлерше ян берген ердеслеримиздинъ ювыклары Якуб Даутовка, Адил Махмудовка, СВО-да кардашлары бар инсанлар Наурбек Акмурзаевке,
олар оьзлерининъ янларын, рахатлыгын аямай, согыс майданга сол аьзирленген юкти еткередилер.
Авыл администрация етекшисиннен де уьйкен ярдам этиледи, ол оьзи де сол юкти ерине еткеруьвде катнаскан.
Йолыгыска йылувлык косты оьзлерининъ яратувшылык оьнерлерин коьрсетуьви мен – СВО катнасувшысынынъ кызы, 10 класс окувшысы Диана Эстуганова эм
5 «а» класс окувшысы Амина Шабазгереева. Буьгуьнги йолыгыс бизге тагы да «Бирликте – куьш» экенин эм ювык аьдемнинъ колтыклавы коьп затка еткеретаганын аян коьрсетти.
Галима Курганова.
Суьвретте: йолыгыста болган аьдемлер куьби.
