Янъыларда Н.К. Крупская атындагы Астрахань областининъ илми китапханасында юрт ногайы, педагогикалык исининъ ветераны, Карагали авыл яшавшысы ногай язувшысы Нурия Гаряевна Максудова ман адабият-анъ кешлиги озды. Онда ногай язувшыдынъ уьш китабининъ презентациясы уйгынланып оьтти.
Ол ногай язувшысы Басир Маджитович Абдулиннинъ «Кыр баьтирлери» деген китабин орыс тилине коьширгени акында айтып хабарлады.
Онынъ эткен уьйкен иси аркалы, астрахань еринде тувган эм 1938-нши йылда дуныядан кешкен кара соьз иеси, журналисттинъ, биринши ногай драматургынынъ яратувшылыгы эндиги окувшыларга орыс тилинде де кенъ таныс болмага амал берилди.
Нурия Гаряевнадынъ «Каргалыгым. Мой Каргалык» деген китаби де Карагали авылынынъ эм автордынъ оьз аьелининъ тамгасынынъ тарихи акында болады.
Шарады Россия Язувшылар союзынынъ агзасы, Астрахань регионаллык боьлик правлениесининъ председатели Юрий Щербаков ашты эм юритти. Педагогикалык исининъ ветераны Нурия Максудова китаплерининъ уьстинде юриткен уьйкен иси, янъы яратувшылык баславлары акында хабарлады. Шарадынъ барысында Нурия Максудова тамыры ногай ярыкландырувшылары Басир Абдулиннен Абдул-Хамид Джанибековка дейим кететаган оьз
аьелининъ тамгасы бойынша йыйган макалаларынынъ уьйкен сулыбы ман боьлисти. Кешликтинъ барысында Россия Язувшылар союзынынъ агзалары
Камиль Гайсин эм Ольга Гребенщикова, астрахань этнографы, тарих илмилерининъ кандидаты Виктор Викторин, ногай эм татар ямагатынынъ ваькиллери, автордынъ авылдаслары, кардаш-тувганлары ортакшылык эттилер.
Ол шарадынъ барысында онынъ катнасувшыларына эм авыл мектеблерине оьзининъ китаплерин савга эсабында берди. Соьйтип, язувшы Нурия Гаряевна юрт ногайларынынъ тарихине эм яратувшылыгынынъ оьрленуьв исине уьйкен уьлисин косты. Шарадынъ барысында миллет анълары, йырлары занъырадылар, ортада туьрли биювлери де коьрсетилдилер. Соьйтип, шара бек кызыклы эм йогары коьнъилде озды.
Бизим хабаршы.
Суьвретте: шарадан коьринис.