Россия аьр заманда да оьз увыллары ман данъклы болган. Олар – Аталыгымыздынъ шынты коршалавшылары. Бурынгы заманлардан алып, элге яв шапса, эр кисилер атланадылар. Солардынъ сырасында – атасы эм увылы Ильяс Юсуп увылы эм Айтуган Ильяс увылы Кулушевлар. Олар – согыс аьрекетининъ ветеранлары.
Атасы ман увылы экеви де бир йылдынъ ишинде – 2023-нши йылда кеттилер. Ильяс Юсуп увылы Запорожская областинде куллык этетаган эди. Кыйынлы эди, биз анълаймыз, кайдай аьллерде эр кисилеримиз согысадылар. Ол увылы уьшин бек кыйналатаган эди.
2024-нши йылдынъ басында Ильяс Кулушев каты согысувлардынъ бирисинде яраланды, химия ман увланып, ден савлыгы осалланып, уьйге кайтып келди.
Буьгуьнлерде Ильяс Юсуп увылы эм Гульшаар Зейнай кызы СВО еринде куллык этип турган увылыннан хабарлар куьтип, Кудайга тилеп турадылар. Айтуган Курской районынынъ Рощино авылында тувган, сонъында онынъ балалыгы, яслыгы Коясыл авылында оьтти. Мунда мектебти битирип, Ставрополь каласында «Авиценна» медициналык колледжине туьседи. Сонъында – армияда куллык этуьв.
Уьш йыл узагында Айтуган Кулушев Ставрополь каласында ФСИН куллышысы болып ислеген. 2023-нши йылдынъ караша айыннан алып ердесимиз Росгвардия управлениесининъ сырасында Запорожская областининъ Мелитополь каласында аьрекетин бардырады. Сулыплы аьскерши «Участнику специальной военной операции» деген медаль мен савгаланган. Согыс баргылар – бизим коршалавшылардынъ йигерлигин эм баьтирлигин белгилев. Оларды босына биревге де тапшырмайдылар. Бизим йигитлер медальлер уьшин согыспайдылар. Олар явды Аталыгы уьшин урадылар. Тувган Эли уьшин, неге десе бу соьздинъ маьнеси уьйкен – мунда тувып-оьскен авылдынъ орамлары, бирдей болып, йол бойында оьсип турган ак тереклер, аьр заманда сени куьтип туратаган ана.
Эм оьзлерининъ увылларына сенетаган уллы Россия.
– Биз енъермиз. Бизим артымызда тувган Элимиз, – соьйтип айтады Россия Савытлы Куьшлерининъ офицеры, СВО ветераны Айтуган Кулушев. Соьйтип айтадылар согысувга кетип бараяткан аьскершилеримиз. Биз оларга сенемиз. Биз олар ман оьктемсиймиз.
Г.Бекмуратова.
Суьвретте: А.Кулушев.
