Бу юмадынъ каты куьнинде Россия бойынша медициналык куллыкшысынынъ куьни белгиленеди. Сол куьнге рас барып, биз газета куллыкшылары, оьзек те, оьзимиздинъ еримизде белсенли аьрекет бардыратаган Ногай орталык больницасынынъ етекшисине соравларымызды каратып, ийги куллыкшылардынъ атларын белгилеп, олар ман
окувшыларымызды таныстырмага алгасаймыз.
Ногай орталык больницасынынъ реанимация боьлигининъ етекшиси Юсуп Саит увылы Атурбаев акында газета бетлеринде ога каратылган разылык хатлар тез-тез баспаланып турады, коьбиси онынъ эмлев сапатыннан баскалай, онынъ ийги соьзлери уьшин савболсынларын айтадылар.
Юсуп Саит увылы бизим конъысы – Шешен Республикасында тувып-оьскен, аьли болса, Ногай районымызда аьрекетин бардырып, абырай-сый казанганлардынъ бириси. Ол мектебтен сонъ – Кизляр каласындагы медициналык окув ошагында, сонъ, Махачкалада йогары медициналык кесписин алды эм бу куьнлерде исин бардырып турган ерде аьрекетин де баслады.
Анестезиолог-реаниматологтынъ борышы – авырувлы аьдемнинъ кавыфсызлыгын канагатлав. Онынъ ис борышлары тынышлардан тувыл: оьлим мен яшав арасында шегилип турган авырувлы аьдемнинъ баьри затын да тергев, ол авырувлыдынъ кыйналувын енъиллетуьв…
Оьзининъ ис борышлары ман сулыплы врач Юсуп Саит увылы Атурбаев бу куьнлерге дейим белсенли каьр шегип, колына туьскен авырувлы аьдемлерге баьри тийисли коьмекти де этип келеди.
Оьзек те, аьдемнинъ яшав оьмири тек врачтынъ колында тувыл, ама тийисли медициналык ярдам этилсе, ол кайдай кыйынлы аьлде болса да, алдыда коьреек куьн болса, себеп те табылады.
Мен бу макаламды язатаган шагымда да Юсуп Саит увылынынъ боьлигинде, онынъ эмлеви астында авыр авырувлы аьлде алты аьдем бар эди. Солай болганда, врачлардынъ ис аьрекетлери тынышлардан тувыл, оларда уйкы да, тыншаюв заманлар да айлак аз болады. Ама сол кеспиди сайлаган аьдем оьзи биледи – кайдай кыйын экенин, ол сайлаган кесписи алдында уьйкен яваплылыкты тутады.
Сондай ис аьрекетте мен баьри медицина куллыкшыларына да, кеспи байрам алдында уьстинликлерди, ийги якка онъайлыкларды, авырувлылар саны аз болганды эм оьзлерине ден савлыкты йорайман. Аьр кайсы куьнинъиз де наьсип нурына толы болсын.
Г.Курганова.
Суьвретте: Ю.Атурбаев.
