Миллет газетамыздынъ оьмиринде соны дуныя ярыгына шыгарувда совет заманында эм оннан сонъгы йылларда редакция журналистлери мен бирге коьп авыл хабаршылары да катнасканлар. Олар, согыс ветеранлары: Карагастан – Коьшманбет Кидирниязов, Карасай Сатыров, Тереклиден – Кельдимурат Койлакаев, Асан Межитов, ис ветеранлары: Батыр-Мурзадан – Аминат Сариева, Червленные Буру-
ныдан – Кульчиков, Сыдыйык Муталимов, Кумлыдан – Эсманбет Абдуллаев, Оьзбек Мурзаев эм сондай коьп баскалар. Олардынъ арасында Куьнбатардан Сраждин Межитовтынъ атын да биз айырым оьрметлик пен атаймыз. Белсенли авыл хабаршымызга, эгер буьгуьнлерге дейим аман-эсен турган болса, 7-нши июньде 80 яс толаяк эди. Сраждин Залимхан увылы – Куьнбатар авылдынъ тарихин-
де оьз алдына тийисли орынды алган аьдемлерининъ бириси. Ол кайсы ерде эм кайсы заманда да ал деп оьзининъ бийик аьдемшилиги, ис аьрекетлиги, билимлиги, намыс тазалыгы эм йылы маскарашылыгы ман тек авылында тувыл, район еринде аты айтылган аьдем эди.
Онынъ яшав йолы да оьз алдына элимиздинъ кайнаган ис аьрекети заманларында белсенли кепте туьзилди. Кыскаша айтсак, Сраждин Межитов бизге Енъуьв мен келген 1945-нши йылдынъ 7-нши июнь куьнинде Караногай районынынъ алдынгы Кара-Тоьбе авылында тувган. 1960-ншы йылда Куьнбатар авылдынъ 7 йыллык мектебин окып биткен сонъ, Хасавюрт кала педучилищесине туьсип, соны 1964-нши йылда кутарган эм ис йолын баслаган. 1964-67-нши йылларда Германиядагы совет аьскерининъ куьбинде эр борышын толтырган. Аьскерде ийги эм коьримли куллык эткени уьшин партия сыра-
сына алынган. Кайтып келген сонъ, Дагестан патшалык университетининъ тарих факультетин окып кутарган. Оннан сонъ коьп йыллар тувган районында окытувшы, мектеб етекшиси, ВЛКСМ Ногай район комитетининъ 2-нши секретари (1971-1974-нши йыллар) болып ислеген. Комсомолда куллык эткен йылларында Сраждин Залимхан увылы, савлайы элимиз бойынша «Кызлар – тракторларга!»
деген шакырувга бойсынып, район еринде биринши хатынкызлар трактор бригадасын туьзгенлери акында кызыклы хабарлайтаган эди.
Сраждин Межитов кайсы заманда да, каерде де оьз авылынынъ эм район яшавынынъ ямагат ислеринде белсенли кепте катнасып келген. Ол зат оны баьриннен де баскалайтаган бас ян сапаты эди. Тувган авылында коьп йыллар Ветеранлар советин басшылап, излестируьв куллыгы ман каьр шекти эм кайтадан согыс катнасувшылардынъ списогын янъыртты. Ога дейим согыстан кайтпаган 37 аьдем белгили болса, сол санды ол 99 аьдемге дейим еткерди. Ызгы йылларында ол, Муса
Курманалиевтинъ фондын басшылай келип, Куьнбатар авыл мектебине онынъ атын беруьв,
азбарына бюстин салдырув ислеринде катнасты. Кизляр калада М.Курманалиев ислеген йылларында яшаган уьйин эм онынъ увылы Риза Курманалиевти тапты, сол уьйге эстеликли белги де
салдыртты.
Сраждин Межитов авылында айтылган татым аьелдинъ де басы эди. Ян косагы ман 4 баласын ийги кепте тербиялап оьстирген, аьр бирисине тийисли билим де берген. Оькинишке, 12 йылдынъ аргы ягында онынъ ялгыз бир увылы эм эки уныгы авыр, йол-коьлик катесиннен сонъ, топырак болдылар. Соннан коьп заман кетпей, ян косагы да дуныядан тайды. Сраждин, аьдем коьтерместей, бу йойымларды да коьтерди. Болса да, сол кайгылы ислер онынъ яшав оьмирин кыскартпай бол-
мадылар…
Сраждин Межитов газета бетлеринде оьз авылынынъ сыйлы эм белгили аьдемлери акында, тарих билдируьвлер язып баспалаган. Ол оьзининъ ызгы куьнлерине дейим тувган газетамыз бан байланысын уьзбеди. Аьр бир байрам куьнинде редакцияга келип, келмесе, телефон ман занъ согып, баьримизди де кутлайтаган эди. Яшавга биз бирерде ялган деген атты да беремиз. Тек, эгер аьдемнен сонъ калганларга онынъ акында ярык эс, йылы эскеруьвлер сакланса, кайтип сондай яшавды ялган демеге болаякпыз? Сраждин Залимхан увылын авыл-эли эндиги де мут- пайды эм коьп йыллар мутпа-
як, неге десе юрегинде тазалык пан яшаган, аьр кимге амал болган шаклы ийгилик этпеге, этпесе де, яхшылык йорамага шалыскан инсаннынъ яшав оьмири ялган болып болмайды. Ол шынтысы ман да ярыкка толган коьримли оьмир.
М.Ханов.
Суьвретте: Сраждин Межитов оьзининъ тувган куьнинде.