Янъыларда Махачкалада яс тергевшилердинъ «Келеекке абыт» XXXI республикалык илми конференциясы оьтти. Онынъ мырады окувшылардынъ интеллектуальли яратувшылыгын оьрлендируьв, оларды излестируьв тергев иске тартув, зейинли окувшылар эм республикадынъ аьлимлерининъ яратувшылык байланысын кеплев болды.
Дагестаннынъ туьрли калалары эм авылларыннан яс зейинли аьдемлер оьзлерининъ илми проектлерин 27 секциясында доьрт туьрли барысларда:
инженерлик, естестволык илмилерде, математика эм информационлы технологияларда коьрсеттилер. Конференция мектеб, муниципаллык эм республикалык кезегиннен туьзилген эди. А.Джанибеков атындагымектебининъ 8-нши класс окувшысы Радия Джумакаева муниципаллык кезегининъ енъуьвшиси болды. Кызалактынъ иси республикада заочный кезегин оьтти. Соны ман байланыста Радия ман онынъ илми етекшиси Диана Ахмедова Махачкалага очный республика кезегине шакырылдылар. Сонда Радия тийисли кепте оьзининъ илми куллыгын яклады эм XXXI республикалык илми конференциясынынъ савгашысы болды. Радияга биз аьли де уьстинликлер эм енъуьвлер йораймыз!
Суьвретте: Р.Джумакаева оьз окытувшысы Д.Ахмедова ман.