Халклар ара ана тил куьнинде Ногай районынынъ Хатын-кызлар советининъ председатели, ДР Ямагат палатасынынъ агзасы Асият Бадий кызы Манкаева, Джанибеков атындагы мектебтинъ окытувшылары Зухра Умар кызы Мавлимбердиева эм Джамиля Залимхан кызы Койлакаева, «Бизим ойын» интеллектуальли ойынынынъ призерлары окытувшылык исининъ ветераны, ДР ат казанган окытувшысы Фатима Янмурза кызы Ярлыкаповадынъ уьйинде конакта болдылар.

Ф.Ярлыкапова белгили ногай язувшысы, ярыкландырувшысы Муса Курманали увылы Курманалиевтинъ окувшысы болады, коьплеген йыллар балаларды ана тилине окыткан, 50 йыл окытувшы болып район мектеблеринде, Терекли-Мектеб педучилищесинде ислеген. Буьгуьнлерде онынъ окувшылары оьзлери балаларга ногай тилине
суьйим эндиредилер, соьйлеп эм язып уьйретедилер.
Фатима Янмурза кызы окувшыларга окытувшылык аьрекети акында хабарлады, ногайша соьйленъиз, окынъыз деп насихат этти. А.Манкаева, З.Мавлимбердиева окытувшы ман ислеген йылларын эске алдылар. Д.Койлакаева педучилищеде окыган, ол Фатима Янмурза кызы оларга кайдай ийги билим бергенин айтты. Окувшылар ясуьйкенге ден
савлык йорадылар, окувы акында айттылар.
Асият Бадий кызы Амин Казий увылы эм Фатима Янмурза кызы Ярлыкаповлардынъ аьели районымыз, республикамыз, элимиз оьрленсин деп эткен куллыгы акында хабарлады. «Шоьл тавысы» газетасы ман оьткерилген яттан окув конкурсынынъ енъуьвшиси Амина Акболатова «Тилек» (Мурат Авезов) ятлавын окыды. Йолыгыс коьтеринъки коьнъилде оьтти.
Г.Бекмуратова.
Суьвретте: йолыгыс катнасувшылары Ярлыкаповлардынъ уьйинде.