Янъыларда республика етекшисининъ басшылавы астында оьткен йыйыннынъ бас темасы – алданган гражданлардынъ ыхтыярларын яклав йолларын
излестируьв. Мошенниклер мен алданганлар санында согыс спецоперациясынынъ катнасувшылары эм олардынъ аьеллери, коьпбалалы аьеллер бар.
Алдаткан курылыс юриткен кампаниясына уголовлык ис ашылган.
Дагестан Республикасынынъ Аькимбасы Сергей Меликов алданган гражданларга оьз коьмегин этеегин билдирген, армаганда мошенниклерден сак болмага керегин де айтып. Солай ок, уголовлык ис ашылып, тергевлер юритилетаган шакта карар алув да тыныш тувыл экенин анълатып озган.
Йыйын барысында ДР Аькимбасы мошенниклердинъ ис аьрекетининъ кайтип баратаганын да анълатып кетти:
– Олар бир аьдемлерден курылыс уьшин акша аладылар, сол карыж баска курылыска кетип турады, – деди ол. Эм, курылыс тармагында сондай законга карсы затларды туьбиннен соьндирмеге керегин де айтты.
Маьселеди шешуьв бойынша кайдай токтаслар этилдилер: Туьзилисинде пай иелери, власть органларынынъ, мэриядынъ эм правосаклав органлардынъ ваькиллери болып, ис куьби туьзилген. Сатув-алув бойынша туьзилген келисуьвлер тергевлерди оьтедилер.
Алданган гражданлардан аьризелер алынадылар, тергев исин юритуьвде 20 правосаклав органларынынъ следовательлери ортакшылык этеди. СМИ эм социаллык тармакларда турак уьй сатып алув бойынша саклык тутув акында билдируьв ислер белсенли юритиледилер.
Солай ок аьр бир турак уьй комплексинде инициативли куьп туьзилген эм сол куьптинъ ваькиллери бу куьнги йыйында да ортакшылык этедилер.
Тез арада алданган гражданлар ман кол басылган келисуьвлер, олар алмага ниет эткен квартиралардынъ оьлшеми эм тоьлеген акшалары акында баьри билдируьвлер де йыйналаяк эм биртурак уьй неше кере де сатылганга уьйкен эс берип, соларга коьре карар да алынаяк.
Йыйында Сергей Меликов правосаклав органларынынъ куллыкшыларына гражданлардынъ аьризелери бойынша тез аьрекетте ис бардырувды баслаганларына оьз разылыгын билдирди.
Йолыгыстан сонъ пай иелери Дагестаннынъ иш ислер бойынша министрининъ орынбасарына оьзлерининъ соравларын бердилер. ДР Аькимбасы бу маьселеди ызына дейим еткермеге эм алданган гражданлардынъ ыхтыярларын саклав уьшин баьри зат та этилеегин билдирди.