Янъыларда Карашай-Шеркеш Республикасынынъ Эркен-Шахар авыл орта мектебинде озган шара СВО катнасувшысы Тимур Исуновтынъ аьели уьшин дайымга эстеликли куьн болып эсте сакланды.
Сол куьн согыс СВО катнасувшысы Тимур Исуновтынъ ян косагына, согыс спецоперация юрген ерде алдына салынган борышларын толтырувда коьрсеткен йигерлиги эм коркынышсызлыгы уьшин аьскерши ян бергеннен сонъ тийисли этилген патшалык савгасы – Йигитлик ордени тапшырылды. Сол куьн ерли орта мектебинде йигиттинъ сыйына «Баьтир партасы» да ашылды. Эндиги онынъ аты, куьн сайын окувшылардынъ эслеринде, – Тимур Исунов оьз уьйкен яшав йолын баслаган мектебинде, дайымга сакланаяк. Сол партасында олтырган окувшыларга, Элине кызмет кылувдынъ йолын сайлаган, уьйкен ойлары, мыратлары болган эм оьзи де сол мектебте окып билим алган йигит аьдемнинъ атын окымага, онынъ тарихи мен таныспага амаллары болаяклар.
«Баьтир партасы» ашылув бойынша шарасында Ногай районынынъ аькимбасы Р.Кумратов, администрация аькимбасынынъ орынбасарлары А.Санглибаев, Г.Касиева, Эркен-Шахар авыл аькимбасы А.Найманов, Карашай-Шеркеш Республикасынынъ Ногай эм Адыге-Хабль районлары бойынша военный комиссары И.Ортабаев эм Тимурдынъ ян косагы ортакшылык эттилер.
«Баьтир партасы» – ол тек эстелик белгиси тувыл. Ол йигитлер акында тек ювык аьдемлердинъ тувыл, бизден сонъ да оьсип келеятырган несиллердинъ эслеринде калдырув болады. Аьр бир йигитлик артында, оьз аьели, уьйкен мыратлары, тиресуьвли касиети эм оьз суьйими болган аьдем туратаганы акында тарихи эсте сакланып келген шаклы, Тимур Исуновтынъ аты оьмирлерге яшаягына соьз йок.
Суьвретте: шарадан коьринис.