Бизим республикалык газетамыздынъ редакциясына шынты разылык соьзлерин билдирген йылы хатлар йыйы келедилер. Коьбисинше газета окувшылары, район яшавшылары врачларга, медсестраларга, социаллык, электроярык пан канагатлав бойынша тармакларынынъ куллыкшыларына, окытувшыларга, тербиялавшыларга эм сондай баскаларга олардынъ намыслы, яваплы эм уьлгили ислери уьшин юрек разылыкларын билдиредилер. Янъыларда редакциямызга кезекли разылык хаты Ногай районындагы Кумлы авылынынъ сыйлы ясуьйкени, ис ветераны Аминат Муслимовна Кожаева атыннан туьсти. Ол оьз разылык соьзлерин хатта булай деп билдиреди:
– Сыйлы редакция! Буьгуьнлерде мен оьз атымнан
Кумлы авыл администрациясынынъ аькимбасы Сакинат Магомедовна Елманбетовага, авыл яшавшыларынынъ ден савлыгын саклавда турган аьдемлердинъ,
айтпага, Кумлы авылдынъ врачебный амбулаториясынынъ фельдшери Насипли Исаевна Суюндиковага, участковый терапевт Баймурза Нурманбетович Толакаевке, социаллык куллыкшысы Зумруд Абдулакимовна Исаевага уьйкен разылык соьзлеримди каратпага суьемен.
Кумлы авыл администрациядынъ аькимбасы Сакинат Магомедовнадынъ ясуьйкенди сыйлап, байрамларда яде кайдай болсын оьзгерисли шараларда
эс берип белгилейтаганы, меним уьйиме келип аманшылыгымды, ден савлыгымды сорап, керексинуьвлеримди билип, ерге туьсирмей толтырмага шалысатаганы уьшин айырым разылыгымды билдиремен. Солай болып, медициналык куллыкшыларымыз фельдшер Насипли Исаевна, участковый терапевт Баймурза Нурманбетович, авылымызда ак халатта маьлиеклердей болып, маразда, сыркавда эмлемеге кол созганы эм тел сокканда ок тез ететаганы да мени бек суьйиндиреди. Олар мен авырыганда, явын-шашынга да карамай, аяз, сувык, шилле демей, укол да этпеге, кан оьлшемин тергемеге, керек заманда дарманлар да аькелмеге, йылы соьзлери мен де эмлемеге, йигеримди бир де йыкпай, оьз ярдамын тийдирмеге асыгадылар.
Солай болып, мага, 90 ясындагы ис ветеранына, оьз ярдамын тийдирип келген социаллык куллыкшысы Зумруд Исаевага коьп йыллар бойы меним касымда
турып, куьн сайынлык уьйкен иси, каьр шегуьви, юрек юмартлыгы уьшин разылыгымды билдиремен. Сизинъ эс беруьвинъиз, шыдамлыгынъыз, акылбалыклыгынъыз, йылувлыгынъыз, этип келетаган исинъиз, ярдамынъыз мени эм мендей ясуьйкенлерди коьтергишлеп, коьнъиллендирип келуьвинъиз уьйкен сыйга тийисли, мен сизинъ эткен кыйынынъызды йогары баалайман эм бек муьсиревлимен.
Сизинъ аьр биринъизге ис аьрекетлеринъизде, аьеллеринъизде бийик етимислерди, онъайлыкты, берекетти, наьсипти, берк ден савлыкты йорайман.
