Уллы Аталык согысы басланатаган куьнде ТереклиМектеб авылынынъ согыс данъкынынъ мемориалында эстеликли митинг болып оьтти.
Йыйылган ямагат алдында Ногай район администрациясынынъ аькимбасынынъ орынбасары Рашид Шангереев шыгып соьйледи. Онынъ айтувы ман, 22-нши июнь – ол Элимиздинъ эм халкымыздынъ тарихинде айырым кайгылы куьн. Уллы Аталык согысы миллионлаган аьдемлердинъ яшавын кыскартты, аьр бир аьелдинъ бактысында эстен кетпес ызын калдырды. Дуныя юзиндеги энъ де кан тоьгисли кавга басланганлы 85 йыл оьтсе де, заман халк юрегиндеги яраларды эндиги де
эмлемеген эм бизим эсимизден давдынъ бир куьнин де муттыртпайды.
«Буьгуьн биз Уллы Аталык согысынынъ ветеранларынынъ, тыл куллыкшыларынынъ йигитлиги алдында басымызды иемиз. Оьз яшавынынъ баалары ман тувган
ерин коршалаган аьдемлер акында эстелик бизим юреклеримизде дайым да сакланып тураяк», – деди Рашид Шангереев.
Оннан сонъ шыгып соьйлеген Ногай районынынъ Хатын-кызлар советининъ председатели, ДР Ямагат палатасынынъ агзасы Асият Манкаева, Ногай район Ветеранлар советининъ председатели Акманбет Сангишиев согыстынъ баслапкы куьни тынышына турган совет халкынынъ яшавын бузганын, алдыдагы 1418 куьнлер 27 миллион аьдемлердинъ оьмирлерин ер астына киргисткенин белгилеп, солар бизим тарих эстелигимиз кебинде несиллерден-несиллерге берилип турмага керегине эс эттилер. Олар буьгуьнлерде де фашизмге карсы эндигиси бизим яс ердеслеримиз, атайларынынъ йолларына туьсип, Элин коршалавда уьйкен эрлик эм баьтирлик коьрсетуьвин шайытладылар.
Митингте солай ок СВО катнасувшысы, ДНРдеги Часов Яр калады босатувда ортакшылык эткен Рустам Байманбетов оьзининъ кыска соьзинде россия аьскершилери аьлиги заманда да аьскершилик антына эм атайларынынъ данъклы енъуьвине алал экенлерин айтып беркитти.
А.Джанибеков атындагы орта мектебининъ окувшысы Айзана Шугаипова поэт Степан Кадашниковтынъ «Согыс ели» деген ятлавын аьр кимнинъ коьнъилине
еткерип окыды.
Митинг катнасувшылары ян берген баьтирлерди эскердилер эм эстеликке шешекей байламларын салдылар.
М.Юнусов.