Тезден савлай дуныядынъ бийкелери язлыктынъ байрамы – Халклар ара Хатын-кызлар куьнин карсы алаяклар.
Байрам алдында «Шоьл тавысы» республикалык газетасы, ДР Язувшылар союзынынъ ногай секциясы ман биргелесип, СВО еринде ян берген катнасувшыларынынъ аналары эм хатынлары ман йолыгыс озгардылар. Редакцияда конакта – Барият Курбанова (Шумлеликтен), Светлана Аджиева (Нариманнан), Заира Абдулова (Карагастан) эм Салимет Эстуганова кызы Диана ман (Куьнбатардан) болдылар.
Келгенлердинъ аьр бириси ювык эм аьзиз аьдемин йойыткан. Сол ян авырувы бизге де коьшпей болмады. Салимет Эстуганова кызы Диана ман келди. Анасы Джамбул Эстугановтынъ акында хабарлаганда, кызы астакырын йылайды. Тыныклыкта коьзяслар тып-тып этип туьседилер, атасы олар ман йок заманды санагандай болып. Бу кишкей саьбийдинъ коьзяслары тувыл, баьтир-атадынъ уьйкен болган кызындыкы. Салимет коьзясын ясырмайды, сонынъ арасында куьлемсиреп, эри мен кайтип бир авылда оьскени, сонъ аьел курып, кыз тувганы акында хабарлайды. Джамбул оларга видеобайланыс пан тел согатаган эди, олар йыласа, айтатаган болган: «Коьзяс тоьксеньиз, мен эндиги сизи мен соьйлемеспен».
Салиметке бу эскеруьвлер бек баалы экенин анълаймыз. Диана онынъ колын сыйпайды, соьйтип анасын коьтергишлейди. Джамбул Эстугановты авылда
ийги аьдем деп билетаган болганлар.
Аьли онынъ акында эс дайымларга калган баьрисининъ де юреклеринде. Заира Абдуловадынъ айтувы ман, атасы куллык эткен гарнизонларда оьсти увылы. Гамзат атасынынъ йолын алып, Аталыкты сакламага кеткен. Программист кесписин байырлаган Гамзат СВО еринде де кеспи бойынша ислеген. Запорожьеде куллык эткен. Куллык этетаган ериннен янъы келген аьскерши экинши куьн авырыган йолдасынынъ орынына тагы да кетеди. Йолда
олар атылув астына туьседилер. «Менде баьри зат та аьруьв» деп язатаган эди Гамзат. Соьйтип ол анасын саклайтаган болган.
Светлана Аджиева да кедеси Ислам акында хабарлайды. Ислам эр борышын толтырмага кетеди, сонъында СВО ерине бармага токтасады. Анасын бек аявлайтаган эди ол, меним «аявлы анам» деп айтатаган болган. Аьел де курды, буьгуьнлерде Светлана келинине Сургут каласына барады, бир-бирисин сондай кайгыда коьтергишлейдилер. Кыйынлы ога увылы акында хабарламага, ама юректеги дертти бираз босатып, бизге хабар айтады. Мен ойлайман,
аналарга балалары кишкей замандагы эскеруьвлер олардынъ кайгысын бираз сама енъил этеди.
Барият Курбанова Шумлелик авылында яшайды. Увылы Курбаннынъ балалыгы, яслыгы кайтип оьткени акында хабарлайды. Курбан медреседе окыган, сонъында бактысын армия ман байланыстырмага токтасады. Атаанасы ман маслагатласып, Владивосток каласында куллык этеди. Сол ерден согыс спецоперациясына кеткен. Курбан танк айдавшы болып ислеген, согысувлардынъ бирисинде танк атылган.
Кардаш-тувганлары ата-анасына коьп заман увылы оьлгени акында айталмай турдылар. Курбан йигитлерше согысып, ян берген.
– Яслар баьриси де баьтирлер эди.
Баьтирлерше ян бердилер. Бир дагестанлы да, бир ногай да согысув майданнан кашпаган, киши Аталыгынынъ атын ерге туьсирмеген. Бизим журналистлер олардынъ акында очерклер язадылар, – деди Эльмира Кожаева, хатынлардынъ хабарларын тынълап.
Сонъында келген конакларга соьзин «Шоьл тавысы» республикалык газетасынынъ яваплы секретари Любовь Уразаева, ДР Язувшылар союзынынъ ногай секциясынынъ етекшиси Гульфира Бекмуратова айттылар. Олардынъ кайбириси аналарга сондай йигитлерди оьстиргенлерине разылык билдирип,
ден савлык эм шыдамлык йорадылар.
Любовь Ибрагим кызы Шешен Республикасында согысувлар болган заманда увылы Сафарбий Уразаев военный врач болып, сол оьзгеристе катнасканы эм
кайтип ол аналардынъ юреклериндеги сезимлерди анълайтаганын айтты.
Аьр бир йогарыда айтылган йигит уьйде, тынышлы яшавда калмага болаяк эди. Джамбул Эстуганов ялгыз кызынынъ яхшылыгын коьрип, суьйинип
турмага, Ислам Аджиев анасынынъ оны ман байланыслы мыратларын толтырып, хатыны ман аьвлетлер оьстирмеге, Гамзат Абдулов Карагас авылында уьйин курып, тувган еринде яшамага, Курбан Курбанов оьз исинде бийикликке етиспеге болаяк эдилер. Тек бакты баскалай буйырды. Заман йигерли
дегенлерди сайлады. Йолыгыс йылувлы эди. Кашан да, коьзяслар бар эди, неге десе йигитлеримизди йыламай, эске алып болмаймыз. Коьзлерде яслар
ман, юреклерде оьктемлик пен. Буьгуьн конакларга гуьл байламлар эм савкатлар тапшырылды. Сондай йолыгыслар маьнели, олар бек керек. Ювык аьдемлерин йойытканларга. Эм бизге, ким уьшин олар яс янларын берген.
Г.Бекмуратова.
Суьвретте: редакцияда йолыгыс.