«Единая Россия» партиясынынъ XXIII курылтайынынъ делегаты Алибек Мурзаев келеектеги бес йылга партиядынъ янъылтылган Халк программасын форумнынъ бас сырагыларынынъ бириси деп санайды. Курылтайда шыгып соьйлевлер барысында РФ Президенти Владимир Путин алдыда болаяк сайлавлар патшалык институтларынынъ берклигин эм политикалык тармагынынъ оьрленуьв дережесин коьрсеетегин белгиледи. Партия председатели Дмитрий Медведев документтинъ ети бас йолларын белгиледи: демографиялык аьлди ийгилендируьв эм аьеллерге ярдамласув, билимлендируьв эм медицина тармакларын ийгилендируьв, регионларды, экономикады эм технологияларды оьрлентуьв, маданият аьдет-йорыкларды коршалав, солай ок суверенитетти эм кавыфсызлыкты канагатлав. А.Мурзаев белгилегенлей, бу пунктлардынъ аьриси бойынша аян ислер этилинип, олар биргелесте аьдемлердинъ яшавын ийгилендирмеге, хозяйстводы эм элимиздинъ коршаланув болымлыгын беркитпеге керек. Буьгуьнде «Единая Россия» партиясынынъ дагестан боьлиги бас мырады – регионнынъ законодательлик эм толтырувшы органлары ман тар байланыс туьсип, Халк программасын яшавга шыгарувга белсен кириспеге керек. «Ерли-ерлерде белгиленген борышларды толтырувга етисуьв керек болады, – деп тамамлады Алибек Мурзаев оьз ойын.