Янъыларда Махачкалада Россия журналистлер Союзынынъ Дагестан региональлик боьлигининъ Правлениесининъ биринши кенъеси озгарылды. 

Шарада региональлик боьлигининъ председатели Магамед Ибрагимов, ревизионлык комиссиясынынъ председатели Мурад Магомедкеримов, Правление агзалары Арсен Юсупов, Вефадер Меликов, Гаджимурад Сагидов, Магомед Магомедов, Руслан Кардашов, Бурлият Токболатова, Любовь Уразаева ортакшылык эттилер.

Кенъесте ортага салынып тоьмендеги соравлар каралды:
— «Савлай Россия-2023» деп
аталып, аьлиги журналистика
форумына (ол Сочиде 18-нши сентябрьде оьтеек) аьзирлик коьруьв;
— Россия журналистлер Союзы агзасы болувга кандидатлардынъ документлерин алув, янъы
кепли удостоверение шыгарув,
Дагестаннан Россия журналистлер агзаларынынъ списогын янъыртув;
— Россия журналистлер Союзынынъ Дагестан региональлик
боьлигининъ яратувшылык биригуьвлерин – этнос белгиси бойынша туьзилген ДР-нынъ миллет
коьлемлик информация амаллар (СМИ) редакцияларында районлар ара яратувшылык биригуьвлер ашув соравы.

Магамед Ибрагимовтынъ белгилеви мен, аьлиги заманга Дагестаннан Россия журналистлер
Союзы сырасында 1460 аьдем бар. Списокларды янъыртув процедурасы быйылдынъ 1-нши декабрине тамамланаяк.
«Россия журналистлер Союзы» Ортакроссиялык ямагат организациясынынъ агзасы акында Положениесине коьре, СЖР агзалар
сырасыннан уьш йылдан артык заман взнослар тоьлемеген, Союзга туьсеекте тийисли документлер бермегенлер тайдырылаяклар.
Белгилев керек, документлерди буьгуьнде журналистлер Союзы агзалары сырасында болып, СМИ тармагында куллык этетаганлар да, янъы туьсеятканлар да туьзетпеге кереклер.