Мине йылдан артык Украина еринде согыс спецоперациясы оьтип туры. Россия, баягы заманларындай болып, сав куьшлерин салып, кир эм нас идеологиялы нацизмди йойытады. Аталыкты коршалавга бизим шынты йигитлеримиз, бир тил, бир ниет болып, турадылар. Олар, колларына савыт-садак алып, янларын, ден савлыгын аямай, бизим япсарларды саклайдылар, керексинетаганларга коьмек этедилер. 

Бизим коьп миллетли республикамыз да енъуьвге оьз уьлисин косады. Сол согысувларда янларын берген ердеслеримизди баьримиз де эслеримизде саклаймыз. Солардынъ ишинде Ногай районынынъ яслары да бар. Коьплеген контрактниклер, оьз эрки мен кеткенлер Аталыкты коршаламага йол алдылар, олар оьз аьеллерин, тынышлы куллыкларын, уьйлерин калдырып, колларына савытсадак алганлар. Сол шынты эр кисилердинъ бириси – меним ердесим Уй-Салган авылдынъ яшавшысы Тагир Байрамов. Баьримиздинъ де эсинде эм юрегинде Россия армиясынынъ офицери, баьтир-десантник Арифулла Байрамов, ол согыс спецоперациясында ян берген, эткен баьтирлиги уьшин Йигитлик ордени мен савгаланган. Буьгуьнлерде онынъ агасы Тагир Байрамов контракт службасына туьскен эм Крым еринде согыс спецоперациясына бармага шеретин карап туры.

– Бизим элимизге кыйынлы заманлар келди, мен оьз элиме пайдалы болмага суьемен. Биз тынышлы аспан астында оьстик эм яшадык, бизим саьбийлер де согыс деген не зат экенин билмесинлер, кайгы коьрмесинлер. Сонынъ уьшин бизге колымызга савыт-садак алмага туьседи. Иним Арифулла да савлай дуныяда тынышлык болсын деп ян берди, онынъ акында эс бизим юреклеримизде дайымларга калган. Сол эске тийисли болмага шалысув керек, – деп айтады Тагир Байрамов.

Ким биледи, кайдай йоллар ман аькетер ясларымызды бакты, ама кайбиримиз йигитлерге берк ден савлык эм уьйге аман-эсен кайтып келгенди йораймыз. Биз сизди куьтемиз, бизим коршалавшылар.

Г.Бекмуратова

Суьвретте: Тагир эм Арифулла Байрамовлар.