ЫЗГЫ КУЬНЛЕРДИНЪ БАС ПОЛИТИКАЛЫК ОЬЗГЕРИСИ

Янъыларда Россия Президенти Владимир Путин Америка журналисти Такер Карлсон ман хабарласып, 60 соравларга яваплады. Уьйине кайтканнан сонъ, Такер Карлсон сол хабарласувды американ заманы бойынша 18 саьатте ( москва заманы бойынша кешеги 2 саьатте) Х соцсетиндеги оьз бетинде ерлестирди.

РФ Президенти В. Путин оьз хабарын Украина ман байланыслардан эм Россия патшалыгынынъ туьзилуьвиннен баслады. Сонъ соьз —  НАТО, армаган СВО ман байланыслы аьллер акында юритилди.

Интервьюди аьлиги заманга 50 миллионнан артык сав дуныя эллердинъ аьдемлери караган.

Хабарласувдынъ бас тезислери:

Украина ман Россия ара кавгаласув аьли 2014-нши йылда басланган. Оны ЦРУ-дынъ яклавы ман савытланган оппозиция юритти.

Россия 2014-ншы йылда кавыф аьллерде болган Крымды оьзининъ колтыклавы астына алмага амалсыз болды.

Украина согысты баслады, а Россиядынъ мырады — оны токтатув.

Москва Украинадагы аьлди соьйлесуьвлер озгарув ман шешуьвге етиспеге суьеди. Россия эм Украина эрте болсын, кеш болсын, бир ой-токтаска келерлер.

Зеленский Россия власти мен соьйлемеге болады, ол оьзин Украина президенти этим санайды.

Украиншылар аьлиге дейим оьзлерин орыслар этип сезедилер, болаяткан зат — граждан согысынынъ белгиси.

Украинада неонацистлерден миллет баьтирлерин эттилер, оларга эстеликлер саладылар — бу теорияды эм практикады токтатув керек.

Украинадагы оьзгерислер кайтип тамамланса да, дуныя туьрленер.

Аьзирлеген Любовь Уразаева