2024-нши йыл – Аьел йылы
Аьр бир аьдем оьзи сайлайды, кайдай баалыкларды алдыга салмага – эдап, аьел, байлык эм сондай баска. Кашан да, яшавда аьр бир оьзгерис, аьр бир оьткен куьн маьнели болады, тек бир зат дайымга – аьел. Эки аьдем мен туьзилген союз инсаннынъ наьсибининъ негизи болады. Соны коьплеген йыллар барысында аьлимлер ыспатлайдылар, соны ман коьп йыллар аьел болып яшаганлар да макул деп айтпага боламыз.
Мысаллар аз тувыл, дурыс, аьел туьзбеге кыйын тувыл, ама оны саклап, сый-абырай казанып, балалар оьстирип, кыйынлыкты да, куванышты да боьлип яшамага енъил тувыл. Сондай татым, айтылган аьеллердинъ бириси деп мен Зейдулла Казтувган увылы эм Рабият Менлиалиевлерди санайман. Олардынъ бактылары тувган заманнан алып байланыслы деп айтсак, оьтирикши болмас. Кумлы авылында тувып-оьскен экеви де. 8-нши класска дейим олар туьрли мектеблерде окыдылар, Рабият Шешен Республикасында окыган, бирге 10-ншы классты кутардылар. Сонъында Зейдула Махачкала каласында политехнический институтта окыйды, Рабият та сонда Дагестан патшалык педагогикалык институтынынъ шет эллер тиллерининъ факультетине туьседи. Яслар уьшинши курста окыганда, аьел туьзгенлер. Коьплеген ерлерде куллык эткен Зейдула Казтувган увылы – Шешен Республикасында, Иркутск областинде, Ставрополь крайында, «Кумлинский» колхозында председатель болып иследи, сонъында Ногай районынынъ ОПФР етекшиси болып куллык этти. Аьлиги заманда сыйлы ясуьйкенимиз тийисли тыншаювда. Рабият Акманбет кызы ис аьрекетин Кумлы авылында окытувшы болып баслаган. Алал ян йолдас, Рабият-абай эри кайсы ерде ислесе, сонда йолланатаган эди эм коьплеген ерлерде ислеген. Аьлиги заманда Рабият Акманбет кызы Кумлы авылынынъ китапхана етекшиси болып ислейди. Зейдулла эм Рабият Менлиалиевлер кайсы ерде ислеселер де, уьстинликли бардырганлар куллыгын. Соьйтип, коьплеген Сый грамоталарга, баргыларга тийисли болганлар. Рабият Менлиалиева «Энъ де ийги китапхана» конкурсында катнасып, Грантка тийисли болган. Бир кызыклы затка сейирим калды бу макалады аьзирлегенде, Рабият Акманбет кызынынъ тукымы Алиева болган, соьйтип ол Алиевадан Менлиалиева болган.
Ясуьйкенлеримиз аьелде эки бала тербияладылар, оьстирип, яшав йолына салдылар. Кызы Джамиля эм увылы Мурзадин оьз аьеллерин курып яшайдылар, балалы-шагалы да болганлар. Йиенлери Марат эм Милана, уныклары Расиль, Фатима эм Алтынай буьгуьнлерде асыл болдылар, биревлери ислейдилер, баскалары аьли де окыйдылар. Расиль атайы ман тетейин кишкей Рамиль мен суьйиндирип койыпты, немересине олар кайтип куьшли куванадылар, олардынъ яшавынынъ маьнеси – бу саьбий.
Зейдулла эм Рабият Менлиалиевлер оьзлерининъ тувганлы 70 йыллык мерекесин карсы алып турылар. Коьплеген оьзгерислерден оьткен аьел буьгуьнлерде балаларга, уныкларга куьезленип яшайды, сол деп ойлайман мен, инсаннынъ энъ де уьйкен наьсиби.
Ак юректен мерекешилерге коьплеген йыллар бирге яшамага, берк ден савлык, коьп суьйинишлер йорайман. Аьелинъиз йылдан йылга коьп болып, сизинъ берген йылувлыгынъыз, салган кыйынынъыз аьвлетлерден алаллык пан кайтсын.
Г.Бекмуратова
Суьвретте: Зейдулла эм Рабият Менлиалиевлер
