Любовь Уразаева

 Сулейман Стальскийдинъ тувганлы 155 йыллыгы республикамыздынъ эм шаирдинъ тувган еринде кенъ аьлинде белгиленеди. Сол сыйлы мереке мен байланыста ДР Аькимбасы Сергей Меликовтынъ баславы ман коьп шаралар озгарылады. Республика етекшиси оны дагестан поэзиясынынъ яркын юлдызы деп атаган. Йогары баа бергенлер Сулейман Стальскийдинъ яратувшылыгына Максим Горький, Борис Пастернак, Николай Тихонов эм коьплеген баскалар.

Йыл узагында республикамызда шатлыклы шаралар, янъы театрлык коьрсетуьвлер, фольклорлык фестивальлер оьтееклер эм муниципаллык маданият учреждениелеринде туьрли форматлы проектлер яшавга шыгарылаяклар.

Байрамшылайды мерекели куьнди илми ямагатшылыгы да – тоьгерек столлар, конференциялар эм илми сессиялар озгарылувы планланган.

Шаралар республикамыздынъ бас каласында эм шаирдинъ тувган ери – Сулейман Стальский районынынъ Ашага-Стал авылында да оьтееклер: поэтикалык митинглер, тематикалык экскурсиялар, яратувшылык кешликлер, «Поэтический микрофон» акциясы, китап выставкалары эм сондай баска коьп амалламалар.