Муннан 25 йыллар артта

1999-ншы йылдынъ август айынынъ 7-де Шамиль Басаевтинъ эм Хаттабтынъ басшылавы астында савыт-садаклы караклар туьркимлери Чечня ериннен Дагестаннынъ баслап Цумада эм Ботлих, сонъ Новолак районларына шапкынлык эттилер. Бандитлерге карсы биринши болып ерли яшавшылар турдылар. Боевиклерди сентябрь айынынъ ортасына бузгышламага эп болды, сонъ Сырт Кавказда уьйкен оьлшемли контртеррористлик операция басланды.

Биринши кере РФ Президенти Владимир Путин, сол заманда РФ Оькиметининъ Председатели, Ботлихте 1999-ншы йылдынъ август айында болып кетти. Сол заманда ол дагестан ополченецлерге эм федеральлик куьшлер служащийлерине Дагестаннан боевиклерди бузгышлап тайдырувда борышларды толтырганы уьшин патшалык савгалар тапшырды, согыс урыслары болган районларында болды, солай ок Дагестан етекшилери эм Россиядынъ куьш ведомстволар басшыларынынъ ортакшылык этуьви мен кенъес озгарды. Онда Чечня ман япсарланган Дагестан районларында экономикалык эм согыс-политикалык аьлди тийисли дережеге келтируьв бойынша карарлар кабыл этилинди, бузылган турак уьйлерди кайтадан тургызув эм дагестан каскыншыларын оьз уьйлерине тез арада кайтарув бойынша шаралар ортага салынып ойласылды.

2019-ншы йылдынъ 2-нши августында Владимир Путин боевиклерге карсы согыскан Дагестан ополченецлерге согыс-урыс аьректининъ ветераны деген статусын беруьв акында законга кол басты. Согыс аьрекетининъ ветеранларына тенъ этилиндилер Дагестан Республикасынынъ оьз-оьзин коршалав отряды сырасында 1999-ншы йылынынъ август-сентябрь айларында контртеррористлик операциясында ортакшылык этип, согысканлар.

Бу куьнлерде Дагестанда халклар ара бандитлер туьркимлери бузгышланганлы 25 йыллыгы белгиленеди.

Л.Уразаева