Аьлиги янъы технологиялар заманында яс аьдем кайдай туьрли зат пан да расады, йолыгысады, бир ерлерде куьшли аьвлигип те кетеди…
Ызгы йоллар туьрли боладылар – бир ерлерде ийгиликке, оьрленуьвге аькеледи, баскасы туьпсиз теренликке де аькетпеге болады…
Мектеб бу куьнлерде яс аьдемди тувра йолга салув уьшин аз куллык этпейди: туьрли оьрлендируьвши шартларды туьзеди, шаралар озгарады, балаларды коьплеген проектлерде катнастырып, район, республика, керек болса, эл кезегине де шыгарады.
Билимлендируьв учреждениелеринде аьрекет бардыратаган «Класс йолыгыслары» деген Савлайроссиялык проекти бу куьнлерде окувшыларга уьйкен мырсатлар береди. Олай дегенимиз, сол проект ишинде окытувшылар ман окувшылар коьплеген белгили аьрекетшилер мен, бу куьнлерде бек уьйкен маьнели согыс спецоперациясында енъуьвди ювыклатып юрген аьскершилер мен йолыгысадылар, коьзбе коьз коьрисип, оьз соравларын бередилер, туврасын айтканда, биринши авыздан хабарын тынълайдылар. Оьзек те, аьр бир йолыгыс оьзининъ терен ызын калдырады, бир ерлерде, сондай йолыгысларда эситкен соьзлер маслагатшы болып, йолбасшы да болады.
Тек янъыларда Ногай районымыздынъ Червленные-Буруны авыл мектебинде болган йолыгыс коьплердинъ эслеринде яркын ыз калдырды. Бу куьнги йолыгыста Ногай район билимлендируьв тармагынынъ етекшиси Амерхан Зейнадин увылы Межитов, СВО катнасувшысы Рустам Мустафаев эм «Аталыкты коршалавшылары» фондынынъ социаллык координаторы Аскерхан Межитов ортакшылык эттилер.
Йолыгыста Амерхан Зейнадин увылы окувшыларга коьп пайдалы насихат соьзлерин айтты. Ол оьзининъ хабарлавында оьсип келетаган несилге патшалыктынъ кавыфсызлыгын канагатлавда Россия Федерациясынынъ Савытлы куьшлерининъ кайдай уьлиси барын, солай ок тувган элге суьйим эм аталардынъ асабалыгы деген анъламлардынъ баалыгын коьрсетпеге шалысты.
– Биз тыныш тувыл заманларда яшаймыз. Тоьгерек ягымызда билдируьвлер де айлак коьп, солай болганда билдируьвлер согысынынъ катнасувшылары деп те оьзимизди айтпага боламыз, ама биз бир аз сак болсак, коьп кыйынлыклардан оьзимизди коршаламага да боламыз эм бу куьнлерде йигитликке де тийисли болмага мырсатымыз да бар.
Бу куьнгидей йолыгыслар бизге аз пайдасын бермейдилер, социаллык тармаклардан келетаган ялган билдируьвлерге карсы шыгып, оьзимиздинъ тувра билгенлеримиз бен аналитикалык ойымызды оьрлендирмеге боламыз.., – деди Амерхан Межитов.
Йолыгыстынъ барысында окувшылар уьйкен кызыксынувы ман согыс спецоперациясынынъ катнасувшысы Рустам Мустафаевтинъ хабарын тынъладылар. Ол оьзининъ аьскер аьрекетининъ сулыбы ман боьлисти. Онынъ хабары тек согыс тарихи тувыл, элге кыйын болган заманда коршалавга шыгып болувдынъ эм патриоттынъ тири шайыты болады. Бу куьн окувшылардынъ СВО катнасувшысына берген соравлары айлак кызыклы эди. Сол СВО темасы не шаклы кенъ маьнели экенин коьрсетти.
Окувшылар согыс спецоперациясынынъ катнасувшысынынъ коьрсеткен йигитлигинде баьтирлер янымызда яшайтаганын, олар эл ишиннен экенин коьрдилер.
Йигерлик эм йигитлик – эр кисидинъ касиетлери, сондай касиетлери бар аьдем шынты эр киси эм, ол Элининъ онъайлыгы уьшин кайдай абытка да бармага болатаганын белгилейди. Рустам Мустафаев – шынты эр киси, ол оьзининъ ийинлеринде ога раскан кыйынлыкларды оьтип болатаган инсан, соны балалар да янлары ман сездилер.
Аскерхан Межитов – согыс спецоперациясында ортакшылык этетаган йигитлерге, олардынъ аьеллерине ярдам этуьвде алды орындагы инсан. Ол болса, бу куьн «Аталыкты коршалавшылар» фондынынъ аьрекети акында хабарлады. Окувшылар, окытувшылар СВО катнасувшыларына, олардынъ аьеллерине тийисли материаллык колтыклав барларын билдилер.
Солай ок, шарадынъ ишинде Амерхан Межитов «Тайны Ногая, хана кыпчакского ханства» китаби акында айтып кетти. Окувшылар ишинде китап пен терен аьвликкен, тарих пен кызыксынганлар да бар эдилер. Элбетте, тарихинъди билмесенъ, яркын келеектеги акында айтып болмайсынъ, Амерхан Зейнадин увылы окувшылардынъ назарын бу ерде де каратып болды.
Бу куьнги йолыгыс бек кызыклы оьтти: окувшылар хабарласувлардан сонъ аьскер савытларын да коьрдилер, кийимди уьстилерине кийип те карадылар.
Сондай йолыгыслардынъ пайдасы уьйкен, неге десе солар аркалы несиллер байланысын да беркитпеге болады.
Г.Сагиндикова,
РФ Журналистлер союзынынъ агзасы.
Суьвретте: йолыгыс катнасувшылары.