Буьгуьнлерде Россиядынъ туьрли муьйислериннен ясларымыз, сонынъ ишинде бизим ердеслеримиз де, согыс спецоперация юрген ерде ортакшылык этип, оькиметимиздинъ кызыксынувларын, кардаш-тувганларынынъ тынышлыгын коршалап келедилер. Куьн сайын биз Украина еринде юрген согыс спецоперациядынъ барысында йигитлик коьрсетип келетаган баьтирлерининъ янъы атларын эситип келемиз, олар ман оьктемсиймиз, аьр кайсысынынъ бактысы уьшин янымыз авырып, кыйналамыз. Коркынышсыз ясларымыз бу тынышлы яшавды савкатлаган атайларын, аталарын эслерине алып, берилген сынавын йигитлерше оьтедилер. 2022-нши йылдынъ курал айында Патшалыгымыздынъ етекшиси Владимир Путин Оькимет Советининъ йыйынында согыс спецоперацияда катнасканлардынъ аьр кайсысын да баьтирлер деп санамага кереги акында булай деген: «Аьскершилер кайдай савгалары болганына да яде онынъ кайсысына тийисли этилеегине де карамастан, Россия эм Донбасс ериндеги аьдемлер эм балалар уьшин оьз яшавларын эм ден савлыкларын аямай, йигитлик коьрсетип келедилер. Олар – шынты баьтирлер, неге десе, биле турып олардынъ аьр кайсысы да оьз яшавларын кавыфлыкка ушырып келеди». Олар Россиядынъ кавыфсызлыгын канагатлавы ман бек маьнели борышын бардырадылар эм, элбетте, савлай Элимиз олардынъ акында билмеге эм айтпага тийисли. Олар биринши сырада энъ кавыфлы ерлерде оьз бактыларын сынап, аьскершилик борышларын алаллык пан толтырадылар.
Янъыларда Элимиз тагы да бир баьтиримиздинъ аты ман таныс болды. Согыс спецоперация юрген ерде ердесимиз Найман Ваисовтынъ коьрсеткен йигерлиги эм йигитлиги акында орталык телевидение каналлары бойынша коьрсетилгени, аьр кайсымызда да ногай ясымыз уьшин оьктемлик сезимлерин турдырмай болмады. Дагестан Республикасынынъ Ногай районынынъ Кумлы авылыннан 2-нши статья старшинасы Найман Ваисов алдышылыкта етекшилев пунктлар ара байланысты иркуьвсиз уйгынлав бойынша аьскершилик борышын толтырып келген. Душпан ягыннан артиллериялык атысувлардынъ токтавсыз барысында антенна алаты эм ретранслятор сакатланган болган. Сонынъ тамамында боьликтинъ негизли радио тармагынынъ кесеги куллык этпей баслайды. Фронттынъ авыр еринде аьскершилик куьзетин оьтуьвде, душпанлардынъ ялынлы отынынъ, токтавсыз явган куьллелери астында оьз яс яшавын аямай, тез аьрекетте байланыстынъ сакатланган ерин аянлап, тез арада туьзетеди. Ердесимиздинъ йогары кеспилиги, йигитлиги аркалы боьликлер ара етекшилев байланысы кайтадан аьрекетлеп баслады. Соьйтип, ердесимиздинъ алдына салынган маьнели борыш етимисли толтырылды.
Бу куьнлерде 2-нши статья старшинасы Найман Ваисов СВО еринде юрген каты урысларда катнасувы ман, 18 ясында фронтка кир ниетли фашистлерден тувган элин коршаламага кеткен оьз атайы Давлен Отегул увылынынъ баслаган исин тийисли бардырады. Давлен мен бирге фашист-баскыншыларга карсы онынъ атайы эм онынъ ети агалы-инилери согыспага йолланган эдилер. Оькинишке, олардынъ биревлери согыс майданыннан артына кайтпадылар, Найманнынъ атайы 1942-нши йылдан 1945-нши йылга дейим службасын мергин полкында мергин болып оьткен. Давлен Отегул увылы – «Эдельвейс» дивизиясын алувда да белсенли катнасканлардынъ бириси. Коркынышсыз аьскерши согыстынъ басыннан алып сонъына дейим ден савлыгын эм куьшин де аямай, согыста ортакшылык эткен. Согыс йолларын йигитлерше оьткен ердесимиз «За оборону Северного Кавказа», «За победу над Германией» медальлерининъ иеси де болган.
Авыр сынавларын тийисли оьткен Уллы Аталык согысынынъ катнасувшысы болган атайынынъ оьткен йолы – аьскерши Найман Ваисовка бек баалы эм дайымга уьлгили коьрим.
Коьплеген согыс йолдасларындай болып, ердесимиз де атайынынъ сол коьрсеткен йолы ман барып, коьптен саклаган Енъуьвге уьйкен косымын этип келеди.
Биз де сондай элин исси суьйген шынты йигитти тербиялаган онынъ ата-анасына уьйкен разылыгымызды билдиремиз. Ердесимиз Найманга ден савлыкты, куьш-куватты, алдындагы борышын етимисли толтырганын эм уьйине, тувган шоьлине тез арада аман-эсен Енъуьв мен кайтканын йораймыз.
Г.Нурдинова.
Суьвретте: Найман Ваисов.