Уллы Аталык согысында янларын берген йигитлердинъ эстелигине 2020-ншы йылда биринши кере Савлайроссиялык «Эстелик бавы» акциясы озгарылды. Согыс спецоперациясы басланганнан сонъ, бизим заманнынъ баьтирлери – СВО катнасувшыларынынъ сыйына эстелик бавлар шашылдылар. Белгиленген акция бойынша савлай элимизде миллионлаган тереклер олтыртылды.
Янъыларда «Эстелик бавы» акциясы бойынша Уллы Енъуьвдинъ 80 йыллыгына Ногай район орманшылыгынынъ куллыкшылары 80 яс тереклер олтырттылар. Шарада «Республикалык орманлар» патшалык учреждениесининъ етекшиси Абдулла Муртазалиев, «Ногайский район» МР Депутатлар Йыйынынынъ председатели Рустам Байманбетов, Терекли-Мектеб авыл администрация куллыкшылары, район Хатын-кызлар советининъ ваькиллери оьз етекшиси Асият Манкаева ман, солай ок Кадрия атындагы мектебиннен волонтерлар катнастылар. Бу куьн согыс спецоперация катнасувшысы, бизим эркинлигимиз уьшин яс янын аямаган Вячеслав Максидовтынъ эстелигине баннер салынды.
Вячеслав Максидов 1989-ншы йылда Терекли-Мектеб авылында тувган. А.Джанибеков атындагы мектебин окып тамамлап, ол кызмет кылмага кеткен. Кызмет кылувын Алыс Куьнтуварда Мурманский областиндеги Рыбацкий поселогында оьткен. Аьскерден кайтып, ердесимиз уьйинде коьп турмай, контракт бойынша службасын бардырган. Ол баслап Буденновск каласында, сонъ Шешен Республикасында куллык эткен. 2014-нши йыл берген присягага алаллыгы уьшин «За службу на Северном Кавказе» коькирек белгиси мен эм «За ратную доблесть» медали мен савгаланган.
2022-нши йылдынъ февраль айында «Вагнер» аьскер компаниясы ман контракт туьзетип, СВО озып турган ерге кеткен. Вячеслав 2023-нши йылдынъ 10-ншы январинде каты согысувлар барысында йигитлерше янын берген.
Вячеслав, Элине кыйынлы заманларда явды соккан баьри йигитлер кимик, дайым да бизим эсимизде эм юреклеримизде яшар!
Нурият Кожаева.
Суьвретте: акция катнасувшылары.