Уллы Аталык согысында ата-бабаларымыз баьтирлик коьрсетип, енъуьвди язлыктынъ яркыраган куьнинде дуныяга аькелгенлер. Буьгуьнлерде де ясларымыз СВО еринде уллы йигитликти коьрсетедилер. Биз баьримиз де олар уьйге аман-эсен кайтып келип, кардаш-ювыкларын суьйинтсинлер деп тилек саламыз. Аьллер кыйынлы, болса да аьскершилеримиз явды кувып, еримиздинъ аьр бир шакырым ерин босатып келедилер. Янъыларда Россия телевидениесинде баьримиз де ердесимиз, Нефтекумск районынынъ Андрей-Курган авылында тувып-оьскен Расул Бакиевти (позывной Ногаец) коьрип, юреклеримиз оьктемликке толды.
Согысувларда катнаскан аьр бир аьскершидинъ бактысы – айырым тарих. Инсан тувган заманда, онынъ бактысы манълайында язылады деп айтадылар. Расул Бакиев Андрей-Курганда оьскен, тенълери мен авыл орамларында ойнагандыр, кеделердинъ ойынлары белгили, агаштан савыт-садак ясап, «согыскандырлар». Тукуй-Мектеб авыл мектебин битирип, Минераловод колледжине туьседи эм машинист кесписин байырлайды. Яс машинисттинъ коьмекшиси болып бир кесек заман иследи, сонъ СВО ерине контрактка кол басып, кетти.
Расул согыс специальли операциясында эки йылга ювык, сол заманнынъ ишинде коьп кыйынлыклардан оьтти. Баслап Расул Белгород еринде куллык этти, сонъында ол йолдаслары ман бирге Харьков ерин явдан босатты. Сол заман яраланды, Питер каласында госпитальде эмленди. Расул Бакиев гвардия корпусынынъ 9-ншы полкынынъ 3-нши штурмовой ротасында данъклы комбат Сергей Чебневтинъ етекшилеви астында Курск областинде каты согысувларда катнаскан. Малая Локня еринде хатын-кызлар колониясын коршалавда комбат Отмель баьтирлерше ян берген. Сонъында, заман кеткен сонъ Расул Бакиев йолдаслары ман бирге комбатты тапканлар эм коьрге салганлар. Сергей Чебневтинъ тул хатынына Россия Президенти Владимир Путин Россия Баьтири медалин тапшырган. Курск АЭС еринде ВСУ аьскерлерин тек токтатув тувыл, комбат 300 аьскершилерди куткарган, оьзи янын берген. Сол яслар суьйикли комбатынынъ баьтирлиги акында айтканлар.
Расул Бакиев СВО еринде коьрсеткен йигитлиги уьшин «За боевые отличия», «Георгиевский крест IVстепени», медаль Суворова патшалык баргылары ман савгаланган. Курск каласынынъ губернаторы Погребки авылында согысувларда катнасканы уьшин Расул Бакиевке «За Курскую область» медалин тапшырган. Янъыларда Расул куллык этетаган боьлик етекшилеви ясты Йигитлик орденин алмага коьрсеткен.
Буьгуьнлерде Расул Москва каласында госпитальде эмленип туры, ол бек каты яраланган. Кене де Курскта врачлар оны бек ийги этип караганлар. Расул олардынъ йогары кеспилигин разылык пан белгилейди. Онынъ аман калганына суьйинемиз, Алла-Таала оны баьле-казадан сакласын деп салган анасынынъ тилегин кабыл эткендир деп ойлаймыз. Анадынъ юреги баласы уьшин авырыйды, кырда юрген кедесин, амалы болса, баьри яманлыктан да коршалар эди. Расулдынъ оьзининъ аьели де, ата-анасы да онынъ ийги болып кеткенин тилейдилер. Кишкей кызынынъ таьлени эш те бардыр, атасы баьтир экенин ол да бир заман анълар, тек аман-эсен уьйге кайтсын.
Мен видеода Расулды согысувда да коьрдим, бир авылды алганына яслар кайтип куьшли суьйинедилер. «Биз енъдик, биз енъдик» деген соьзлерин эситемен, сонъында атылатаган миналар салынган сокпак пан барадылар. Сол да кайдан уьйкен йигитлик. Суьйинедилер босатылган ерлерге аьскершилеримиз. Кайтип суьйинмесинлер, кайдай кыйынлык пан аладылар олар аьр бир авылды, аьр бир бийикликти. Сонынъ баасы – йолдаслардынъ курманлык этилинген яшавлары.
Соьйлеймен Расул ман, анълайман, ога соьйлемеге де, язбага да кыйын, болса да меним хатеримди калдырмага суьймейди, оьзи, йолдаслары акында хабарлайды. Мен де ога: «Баьри зат та аьруьв болар, кедем» деп айтаман. Кашан да, аьруьв болар, неге десе бизим тынышлыгымызды Расул Бакиевтей йигитлеримиз коршалайдылар. Олар савлай дуныяга енъуьвди аькелер деп шекленмеймиз.
Г.Бекмуратова,
Россия Журналистлер союзынынъ агзасы.
Суьвретте: Р.Бакиев эм В.Соловьев.