Ногай районынынъ Терекли-Мектеб авылында уьстимиздеги айынынъ 19-20-ншы куьнлеринде Россия Баьтири Рафик Кадырбулатовтынъ эстелигине бокс бойынша ашык турнир озгарылаяк.
Рафик Валит увылы Кадырбулатов 1976-ншы йылдынъ тамбыз айынынъ 13-нши куьнинде Астрахань областининъ Пойменный авылында тувган. 1994-нши йылдынъ караша айында Россия Федерациясынынъ Савытлы Куьшлерининъ сырасына алынган, куллыгын «Росич» специальли отрядында бардырган. 1995-нши йылдынъ коькек айынынъ 18-нши куьнинде «Росич» отряды Бамут касындагы Лысая гора еринде корсалавга туьскен. Рядовой Кадырбулатов коршаланувдынъ онъ ягын оьзи япкан эм явды урып турган. Каты яраланса да, согысувды коймаган. Ол 12 каракларды оьлтирген, явлар оны есирге алмага суьйгенлер, ама йигерли ердесимиз оьзин де, уьш каракларды да граната ман аткан. Ясты кишкей Аталыгы – Пойменный авылында коьрге салганлар.
Россия Федерациясынынъ Президентининъ Указы ман1996-ншы йылдынъ шилле айынынъ 20-ншы куьнинде Рафик Валит увылы Кадырбулатовка Россия Баьтири деген ат берилген (оьлгеннен сонъ).
Турнирдинъ уйгынлавшылары – «село Терекли-Мектеб», «сельсовет Арсланбековский», «село Кунбатар» авыл поселениелери, «Ногайский район» МР «Яслык» яслар орталыгы, «Ногайский район» МР ДЮСШ, Москва каласындагы «Ногай община» организациясы.
Турнирдинъ бас тоьрешиси Динислам Исмаиловтынъ айтувы ман, ярыста Ногай районынынъ эм конъыс регионларынынъ яс боксерлары катнасаяклар.
Бизим хабаршы.