Ногай район администрациясында совет халкынынъ Уллы Аталык согысында Енъуьвининъ 80 йыллыгын байрамшылавга район ямага-тынынъ аьзирлиги акында кезекли кенъес болып оьтти.

Шарады ашаятып, район администрациясынынъ аькимбасынынъ орынбасары Мурат Шадиев йыйылганларга «Ногай» деген автономлы коммерциялык тувыл биригуьв, бу данъклы
байрамга багыслап, Терекли-Мектеб авылдан Дербент калага дейим 9-ншы май куьниннен алып атлылар юрисин озгармага аьзирлик коьруьви акында билдирди. Биригуьвдинъ ваькиллерининъ соьзлерине коьре, бу шарада солай ок шет эллер гражданлары да ортакшылык этееклер. Сол себептен
белгиленген атлылар юриси халклар ара статусы ман оьткерилмеге каралады.
Кенъесте солай ок Уллы Енъуьвдинъ мерекесине багысланган автомобиль ювырысын озгарув акында соравда ойласылды. Айтылган сорав бойынша Ногай район Согыс, ис, савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев шыгып соьйледи. Онынъ соьзи мен, аьдетли автомобиль ювырысы район авыллары бойынша 5-8-нши май
куьнлеринде оьткерилмеге каралады. Автомобиль ювырысы 5-нши май куьн Терекли-Мектебтен басланып, 8-нши май куьн Куьнбатар авылында тамамланаяк. Сол куьнлер ишинде, 7-нши май куьнинде, Сылув-Тоьбе авылында согыс катнасувшыларына багысланган эстелик белгиси шатлыклы аьлде ашылаяк. Кенъестинъ ызында район орталык китапханасынынъ директоры Сабират Абубекерова район орталыгы Терекли-Мектеб авылында Енъуьв байрамы куьнинде кайдай шаралар болып оьтееги акында хабарлады. Онынъ айтувына коьре, байрам шаралары авылдынъ куьнбатар бетиннен сонынъ орталыгына дейим «Оьлимсиз полктынъ» юриси мен (соны район аькимбасы Джа-
малутдин Эсиргепов басшылаяк) басланаяк. Оннан сонъ районнынъ юнармеецлер парады, эртенъги 10 саьатте согыс йылларында ян берген ердеслердинъ эстелиги янында район ямагатынынъ аьдетли митинги оьткерилеек. Митингтен сонъ авыл орталыгында уьрли маданият, спорт шаралары озга-
рылмага каралады, аьдетли «Полевая кухня» курылып, ердеслерди аьскершилер асы ман канагатлаяк.
М.Ханов.