Ногай районынынъ ямагаты Уллы Аталык согысында совет халкынынъ немец-фашист Германиясын Енъуьвининъ 80 йыллыгын кенъ эм шатлыклы кепте белгиледи.
Байрам сол куьн эртенъги шакта авылдынъ куьнбатар бетиннен «Оьлимсиз полктынъ» юриси мен басланды. Парад катнасувшылары аьдетке коьре Баьтирлер аллеясындагы бюстлерге де шешекей байламларын салып, парктагы Данъклык мемориалына йол алды. Мунда Уллы Енъуьвдинъ 80 йыллыгына багысланган эстеликли митингти сондай савлайхалклык шатлыклы шараларды дайым да юритуьвши ДР ат казанган маданият куллыкшысы Сабират Абубекерова ашты эм юритти.
Байрам митинги алдында дав йылларында ян берген ердеслеримиздинъ эстелиги янына Енъуьв Байрагынынъ копиясын СВО катнасувшысы, реактивли артиллерия дивизионнынъ командири, согыс ветераны Саллыбай Ярикбаевтинъ уныгы Арсен Ярикбаев пен байрак куьбининъ командири, согыс ветераны Язманбет Айтманбетовтынъ унык кызы Росита Теминдарова ман ассистентлер: дав катнасувшысы Тахир Имбировтынъ унык кызы Динара Заргишиева эм согыс ветераны Муса Байгараевтинъ унык кызы Юлдуз Байгараева еткердилер. Муннан сонъ парад маршы ман районнынъ авыл орта мектеблерининъ юноармеецлери юрип оьттилер.
Район яшавшыларын эм конакларды кутлай келип, Ногай район администрациясынынъ аькимбасы, согыс катнасувшысы, танкист Шавдир Эсиргеповтынъ уныгы – Джамалутдин Эсиргепов 9-ншы Май куьни ол тек парад эм байрам тувыл, ол ал деп согыстан кайтпаганларга, согыс ветеранларына эстелик сый экенин белгиледи. Ногай районыннан фронтка баьриси 2500 аьдем кеткен, олардынъ 1900-и дав кырларында дайымларга калганлар. Аьлиги заманда тагы да согыс спецоперациясы юрип туры, ол, элбетте, баска, ама оьзининъ дурыслыгы ман тап сондай дав аьрекети болады. Тагы да Ногай ериннен Аталыкты коршалавшылар согыска кетедилер. Тагы да биревлер кайтпайдылар. Районымыздан 29 аьдемнинъ кыскартылган яшав оьмирлери: увыллар, эрлер, дослар, биз билетаган, суьетаган аьдемлер. Юрекке авыр болса да, биз оларды эсимизде саклаймыз. Тувган элимизди коршалап, яшавдан кеткен баьтирлерге оьмирлик данък!» – деп белгиледи Джамалутдин Эсиргепов.
Район Ветеранлар советининъ председатели, согыс катнасувшылары Бальбек эм Умар Бальгишиевлердинъ тувган кардашы Акманбет Сангишиев Уллы Енъуьвден сонъ коьп затлар туьрленгенин, ама Совет Союзынынъ Коммунистлер партиясынынъ етекшилеви мен этилинген халк йигитлиги бир де туьрленмей турувын белгиледи.
Ногай район кыйыншыларын ДР Халк Йыйыны, КПРФ Дагестан рескомы эм Ногай район комитети атыннан ДР Халк Йыйынынынъ депутаты, согыс катнасувшылары Байбош Отегеновтынъ эм Елманбет Авезовтынъ уныгы Мурзадин Авезов кутлады. Ол бизи мен бирге совет халкынынъ Енъуьвининъ 80 йыллыгын Ер юзинде эркинлик эм тынышлык уьшин янларын берген аьдемлер акында эстеликти баалайтаган сав дуныя байрамшылавын белгиледи.
Байрам митингте район яшавшыларын солай ок Ногай район Депутатлар йыйынынынъ председатели Рустам Байманбетов, ерли аьскер боьлигининъ командири, согыс катнасувшысы Степан Бондаренкодынъ уныгы, тамада лейтенант Илья Бондаренко, Тарумов эм Ногай районларынынъ аьскер комиссары Ваха Хафизов, СВО еринде йигитлерше янын берген Ислам Абдулбариевтинъ анасы Гульфира Абдулбариева, А-Х.Джанибеков атындагы орта мектебининъ окувшысы, согыс катнасувшысы Идрис Шангереевтинъ уныгы Абакар Шангереев, Ногай район Имамлар советининъ председателининъ орынбасары кутладылар.
Район яшавшылары элимиздинъ буьгуьнги йигитлери, СВО катнасувшылары – киши сержант Руслан Сагиндиковты, ефрейтор Эмирлан Амангазиевти, Руслан Зарманбетовты, сержант Рустам Мустафаевти, 169-ншы айырым мотострелковый бригада командирининъ орынбасары, капитан Алимбек Доржиевти хош коьрип йылы йолыктылар. Олар баьриси де Уллы Аталык согыс аьскершилерининъ уныклары боладылар. Бу ерде СВО катнасувшылары атыннан Алимбек Доржиевке соьз берилди.
Митингтинъ ызында район орталыгынынъ ис коллективлерининъ ваькиллери эстеликке шешекейлер байламларын салдылар эм согыста ян бергенлерди эскердилер.
Митингтен сонъ Патшалык ногай саз алатлар оркестрининъ куьши мен аьзирленген байрам концерти оьтти. Сол ок заманда ДР Язувшылар союзындагы ногай шаирлерининъ эм язувшыларынынъ секциясынынъ «Согыс акында ятлавлар окыймыз» деп аталган поэзия майданы шатлыклы аьлде ашылды.
М.Ханов.
