Уллы Енъуьвдинъ 80 йыллык мерекесине багысланган шаралар программасы ишинде билимлендируьв учреждениелеринде туьрли амалламалар оьткериледилер.
Ногай районымыздынъ орталыгында аьрекетин бардыратаган балалар яратувшылык уьйинде де сол оьзгерисли мерекеге багысланып, суьврет ясав шарасы уьстинликли эм кызыклы оьтти. Сонда Ногай районымыздынъ мектеблериннен талаплы окувшылар катнастылар. Аьр бир ясалган суьвретте согыс йыллардынъ атылган куьллелери, аьскершилердинъ каны тоьгилген ерде оьскен боьригоьзлер эм енъуьвдинъ завыклы шагы бар эди. Туврасын айтканда – аьр бирисинде согыстынъ бир кесек заманы…
Шарада енъуьвшилер де белгили болдылар, оьзек те, онсыз болмайды, ийгилердинъ ишинде де бираз артыклыгы болганлар бар эди.
Шара бойынша биринши орынга Нариман авыл орта мектебининъ окувшысы Ясмина Тенгизова, окытувшысы А.Садыкова, экинши орынга Куьнбатар авыл орта мектебининъ окувшысы Салима Отемисова, уьшинши орынга балалар яратувшылык уьйининъ тербияланувшысы Насипхан Кокурова, эки кыздынъ да насихатшысы К.Янполова тийисли болдылар.
Шарада катнаскан аьр бир окувшыга эс этилди, савгалы орынларга тийисли болганлар грамоталар ман савгаландылар.
Г.Курганова.