Уьстимиздеги йылдынъ коькек айынынъ ишинде Яшавшыларды ис пен канагатлав Ногай район орталыгынынъ куллыкшыларынынъ уьйкен куьш салувы ман «Россияда аьрекет. Мырсатлар заманы» деп аталган савлайроссиялык ис ярмаркасынынъ Биринши регионаллык кезеги уйгынланып, оьткерилди. Бу шара Ногай районынынъ коьплеген мектеблерининъ окувшылары ман окытувшыларын йыйды, сол да босына тувыл, неге десе келеекте олардынъ алдыларында кеспи сайлав соравы тураяк.
Сол куьн Терекли-Мектебтинъ Халк яратувшылык орталыгынынъ меканында оьткен шарада катнаскан инсанлар оьзлерине коьп пайдалы затлар алдылар.
Йыйылганлар алдында биринши болып, Яшавшыларды ис пен канагатлав орталыгынынъ етекшиси Рустам Такташев, хош келди айтып, бу куьн мунда келген аьр бир инсан оьзине янына якын кеспиди сайламага мырсат табаягын эм коьп пайдалы билдируьвлер мен канагатланаягына сеним берди.
Бу куьн мунда кеспи сайлав алдында турган окувшылардан, ис аьрекетте керексинген аьдемлерден баска болып, бос ис орынлар бар организациялар етекшилери де ортакшылык эттилер. Шара барысында ис орынларга ерлестирилгенлер де эм 150-ге ювык аьдемлер заманын пайдалы озгардылар, келеекте ис рыногында бу куьнлерде керекли кеспилер акында билдируьвлер алдылар. Айтпага, районы бойынша туьрли организацияларында бар бос ис орынлар ман ис излевшилерди таныстырдылар, шара уйгынлавшылары регион кырында туьрли тармакларда бар ис орынлар акында билдирдилер.
Шарадынъ барысында концерт те болды. Йыйылганлар алдында «Ай-айданак» балалар биюв ансамбли ногай миллет кийиминде «Яслыгымнинъ коьнъили» деген биювин коьрсеттилер.
Бу куьн Батыр-Мурза авыл мектебининъ окувшысы, «Меним келеектеги кеспим» республикалык конкурс енъуьвшиси А. Шандиева янъы технологиялар бойынша аьзирлеген куллыгы акында билдируьв этти.
Солай ок, бу шарада мектебти кутылмага турган окувшылар араларында «Карта профессий» деген ойын да оьткерилди, куллыксыз калган аьдемлерге пайдалы маслагат – аьлиги заманда керекли кеспиге окымага болатаганы акында айтылды.
Яшавшыларды ис пен канагатлав орталыгы ман бу куьн уйгынланган шара коьп пайдасын береегине шек йок.
Галима Курганова.
Суьвретте: Яшавшыларды ис пен канагатлав орталыгынынъ куллыкшылары.