Ногай районында Уллы Енъуьвдинъ 80-йыллыгына багысланган хатынлар автоювырувы оьз йолын муниципалитет авыллары ман бардырды. Район орталыгыннан коьликлер эки кесекке боьлинип, бириси Орта-Тоьбе, Уьй-Салган, Куьнбатар авылларына, экиншиси Карасу, Кумлы, Эдиге авылларына карап йолландылар.
Автоювырув катнасувшылары – Уллы Аталык согысынынъ ветеранларынынъ кызлары, уныклары эм немерелери, солай ок СВО катнасувшыларынынъ аналары, хатынлары эм абалары Терекли-Мектеб авылындагы паркындагы эстелик касында йыйылдылар. Мунда озгарылган митингте Ногай район Ямагат палатасынынъ председатели Эльмурза Саитов, Терекли-Мектеб авыл аькимбасы Марат Кулунчаков, СВО катнасувшысынынъ хатыны Альфия Акимова шыгып соьйледилер. Олар ДР Ямагат палатасынынъ агзасы, Ногай район хатын-кызлар советининъ председатели Асият Манкаевага автоювырувды эм баска шараларды уйгынлаганы уьшин уьйкен разылыгын билдирдилер.
Орта-Тоьбе авылындагы мектебинде шатлыклы митинг озды, оны «Молодая гвардия» юнармеецлери аштылар. Линейка барысында авыл администрация аькимбасынынъ орынбасары Сербетхан Абубекерова, СВО катнасувшысы Рахим Даутов, Асият Манкаева, СВО барысында ян берген аьскершидинъ атасы Динибек Шамсудинов шыгып, юрегиндегин айттылар. Солай ок конаклар авылдынъ хатынлары бизим аьскершилерге СВО озып турган ерде явдынъ дронларыннан ясырынмага шилтелер согатаган меканда да болдылар. Мунда Асият Бадиевна эки СВО катнасувшысынынъ анасы Сапуэт Даутовага шилтелер сокканы уьшин Разылык хат эм акшалай баргы тапшырды.
Уьй-Салган авылында да конакларды бек ийги йолыктылар. Бас деп оларды мектеб етекшиси Зульфия Кожаева хошлады. Оннан сонъ район администрация ваькили Зухра Аджиманбетова, Шешен согыс оьзгерислерининъ катнасувшысы Елена Жукова, СВО катнасувшысынынъ хатыны Зарема Оразбаева шыгып соьйледилер. Сонъ балалар ятлав окып, йырлар йырлап, конакларды сукландырдылар. Боьтен де баьтирлерге багысланган йырды йырлаган окувшы Тагир Кочекаевти белгилемеге болады.
Куьнбатар авылында Маданият уьйиннен алып Баьтирлер эстелигине дейим аьскер кийим кийген окувшылар конаклардынъ оьктемлигин оьстирдилер. Мунда шатлыклы митинг «Священная война» йыры ман Енъуьв байрагын шыгарув ман ашылды. Бу авылдынъ да элимиздинъ бойсынмаслыгы уьшин яшавларын аямаган оьз баьтирлери бар, олар – Фазиль Менглиязов эм Джалил Махмудов. Экеви де Йигитлик ордени мен оьлгеннен сонъ савгаланганлар.
Шара барысында авыл ясуьйкени Маутали Куванаев, ДР ат казанган окытувшысы Вагидат Янполова, СВО катнасувшысынынъ тетеси Байрамбике Акмурзаева, бизим заманнынъ баьтирлерининъ аналары Зафира Оразбаева, Гуля Мурзаева, Рая Салакаева, СВО катнасувшысынынъ абасы Альмира Махмудова эм Динибек Шамсудинов шыгып соьйледилер. Йолыгыс эстеликлерге гуьл байламлар салынувы ман тамамланды.
Н.Кожаева.
Суьвретте: Орта-Тоьбе авылындагы митингтен коьринис.