Тек янъыларда Сургут каласынынъ эм Федоровский поселогынынъ ерли яшавшылары болып саналатаган ногайлары да «Кайтпастынъ тойы» спектаклин карап, коьнъиллерин коьтердилер.
Уьстимиздеги йылдынъ апрель айынынъ 9-11-нши куьнлеринде ногайымыздынъ патшалык театры биринши кере сырт якларда яшайтаган ногайларымызда конакта болып, оларга оьзлерининъ оьнерлерин коьрсетип кайттылар.
Театр куллыкшылары Гульфия Расул кызы Кокоевадынъ етекшилеви астында барган ерлериннен уьйкен разылыгы ман кайттылар, толы коьнъил мен оьзлери де сол яклардагы халкымызга коьнъил савкатладылар, бу куьн «Кайтпастынъ тойы» яхшы тойланды.
Куьн ярыклы Дагестан Республикасыннан барган яратувшылык коллективин кар уьстинде шагаласкан куьн саьвлеси мен Сургут каласы йолыкты.
Сахнага салынган спектакльде – яшав суьлдери, маданият байлыгы, тил ярасыклыгы. Бу куьн бизим театр куллыкшыларымыз бек яркын аьлинде ногайымнынъ маданиятын коьрсетти. Бу спектакльди карамага келген аьдемлер толы кепте аьдетли ногай саниятынынъ атмосферасына коьмилди деп айтпага боламыз.
Оьз рольлерине толы коьмилген артистлер, тек оьзлерининъ кеспи усталыкларын коьрсетип калмай, каравшыга миллетимиздинъ ян байлыгын да усташа сездирип билдилер. Спектакльди караган ердеслеримизге оьзлерининъ тувган якларынынъ йылувлыгын сезбеге де амал болды.
Сырт якларда болып кайткан ногай патшалык театрынынъ ис коллективи де бек разы болып кайтты. Маданият яшайды, эгер биз оны оьрлендирип, кенъ яйып болсак…
Г.Курганова.
Суьвретте: Ногай патшалык театры Сургут каласында.