Оьткен юма ишинде Кумлы авылдынъ Д.М.Шихмурзаев атындагы орта мектебинде шатлыклы линейка сыйлы конакка – мектеб выпускнигине, бу куьнлерде согыс
спецоперация юрген ерде Элин коршалайтаган аьскершиге багысланган эди. Шара
мектеб азбарында патшалык байрагын коьтеруьв мен эм элимиздинъ гимныннан бас-
ланды. Россия байрагын коьтермеге уьйге кесек заманга тыншаювга келген Арслан
Беймурзаевич Мурзаевке ыхтыяр берилди. Сыйлы конакты тувган мектебинде Кумлы авыл администрациясынынъ аькимбасынынъ орынбасары Джалиль Асанович
Бегалиев, согыс спецоперация юрген ерде катнасатаган аьскершилеримизге явдан
коршаланувга шилтерлерин аьзирлев бойынша исинде белсенли катнасувшыларынынъ бириси Зумруд Аблеевна Исаева, ерли мектеб етекшисининъ тербиялав иси бойынша орынбасары Феруза Курманалиевна Абдунасова, профсоюз организациялар бойынша алдышы аьрекетшиси, баслангыш класслар окытувшысы Фарида Османовна Менлиалиева, онынъ окувшылары, мектеб окувшылары СВО катнасувшысына йигитлиги, коркынышсызлыгы, йигерлиги уьшин уьйкен разылыгын билдирдилер эм уьйине енъуьв мен аманэсен кайтканын йорадылар. Солай болып, Арслан Мурзаев те шатлыклы линейкада болганларга шакырганларына, аьр кимге де СВО катнасувшыларына этип келетаган ярдамы уьшин уьйкен разылыгын билдирди
эм окувда, куллыгында етимислерди, йогарда таза эм ашык коькти йорады эм мек-тебтинъ келеекте уйгынланаяк музейине савга эсабында квадрокоптер тапшырды.
Сол куьн волонтёр Зумруд Аблеевна Исаева авыл кыскаяклылары атыннан СВО кат-
насувшыларына аьскершилерди явдан ясырынув уьшин аьзирленген шилтерлерин, ол
аьскершилеримиздинъ блиндажларын, техникасын душпаннынъ дроныннан корша-
лаягына эм, бас деп, энъ баалы болган, олардынъ яшавларын куткараягына сеним
этуьви мен, СВО ерине кетпеге йолланган Арслан Мурзаевке тапшырды. Шатлыклы
шарадынъ тамамында баьри катнасувшылар да бирге косылып эстеликке суьвретке
де туьстилер. Белгилеп озайык, Ногай районынынъ Кумлы авыл яшавшысы Арслан Мурзаев «Каспий» Дагестаннынъ оьз ыхтыяры бойынша батальонынынъ сырасында 2023-нши йылдынъ караша айыннан алып кызмет этип баслады. Согыс спецоперация барысында ДНР, ЛНР эм Украина еринде юрген согыс урысларында катнасып келди. Коьп кере артиллериялык оты астында яралы йолдасларын шыгарувда йигитлик, шын-
ты патриотлык сапатлыкларын коьрсеткени, йигитлиги уьшин «Каспий» батальонынынъ етекшилеви атыннан Разылык хатына тийисли этилген. Солай болып, ногай ястынъ эткен йигитликлери Донецк Халк Республикасы атыннан да «За отвагу» медали мен белгиленген. Оьткен йылдынъ ишинде аьскершилик борышын толтырувда йигитлиги, коркынышсызлыгы эм йигерлиги уьшин «За отвагу» патшалык савгасына да тийисли этилген. Буьгуьнлерде болса ердесимиз Арслан Мурзаев «Барс» отрядында ортакшылык этуьви мен Элин душпаннан коршалавда, енъуьвди ювыклатувда оьз уьлисин косып келеди.
Г.Нурдинова,
РФ Журналистлер Союзынынъ агзасы.
Суьвретте: Арслан Мурзаев.