«МинводыЭКСПО» МВЦ-да (Минеральные Воды) 25-27-нши майда Кавказ инвестиционлык форум (КИФ-2025) болып озды. Шара патшалык структуралар эм бизнес етекшилерин, экспертлерди, солай ок коьлемлик информация амаллар ваькиллерин бирлестирди. Форумды Россия Федерациясынынъ Оькиметининъ эм РФ экономикалык оьрленуьв министерствосынынъ себеплик этуьви мен Росконгресс Фонды уйгынлады.
Кавказ инвестиционлык форумы РФ Президенти Владимир Путин мен илмидинъ эм технологиялардынъ онйыллыклары деп билдирилген «Илми эм бизнес» баславына киргистилген.
КИФ-2025 бес мынънан артык катнасувшыларды кызыксындырды: олар – патшалык власть органлар ваькиллери, алдышы россиялык эм шет эллер корпорациялардынъ йогары дережели етекшилери, солай ок аьлимлер эм технологиялык предпринимательлер. Быйыл форумнынъ бас темасы – «Инвестиционлык йол: Аьвелги. Аьлиги. Келеектеги». Дагестан делегациясын ДР Аькимбасы Сергей Меликов басшылады.
Республика аьдеттегиндей оьзининъ выставка экспозициясы аркасы ман конакларга дагестан экономикасынынъ баьри куватлыгын, етимислерин эм уьстинликлерин коьрсетти. Уьйкен маьне берилди «Каспийский прибрежный кластер» проектине.
Айырым эс каратылды социаллык соравларына. Регион етекшиси «Баьтирлердинъ кайтувы: Сырт Кавказдынъ курортларында аьскершилердинъ реабилитациясы» деген маьнели тоьгерек столда ортакшылады, РФ Оькиметининъ председателининъ орынбасары Александр Новактынъ басшылавы ман оьткен «2036-ншы йылда СКФО келпети» пленарлык кенъесте шыгып соьйледи. Форумда солай ок СКФО-дынъ баска регионлары ман биргелес аьрекетлев акында бир неше келисуьвлерге кол басылды.
Бас оьзгерис – ДР Оькимет комиссиясынынъ РФ Оькиметининъ председатели Михаил Мишустиннинъ басшылавы ман озгарылган СКФО оьрленуьви бойынша кенъесте ортакшылык этуьви.
Михаил Мишустин форумда Дагестан Республикасынынъ стенди мен танысты. Онда ДР Аькимбасы Сергей Меликов пан, туьрли тармаклар эсапка алынып, экономика оьрленуьвине пайдалы биргелес ис аьрекети (кластерлик) белгиленип, республикадынъ бас инвестиционлык проектлери коьрсетилген.