«Буьгуьн Дагестан етекшиси Сергей Меликов ДР Халк Йыйынына каратылган йылсайынлык Язбасы ман шыгып соьйлеек. Алдынгы Язбасында, республикадынъ етисилген бас уьстинликлери акында айтылып, Дагестаннынъ армаган социал-экономикалык оьрленуьви бойынша борышлар салынганын билемиз. Соларды яшавга шыгарув уьстинде сезимли ислер этилген», – деп белгилейди «Шоьл тавысы» республикалык газетасынынъ эксперти, Ногай район администрациясында Ямагат палатасынынъ председатели Эльмурза Саитов.
– Мени, Ногай районынынъ яшавшысын, бас деп экология соравлары, Ногай шоьлининъ ерлерин, сонынъ ишинде коьшпели маллардынъ отлаклары ман тийисли аьлде пайдаланув эм аявлап саклав, шоьлдинъ кумлакларга айланатаганы ман байланыслы маьселелер навасызландырады. Солай ок айырым эс каратувды эм кескинли шаралар коьруьвди талаплайды регионда калдыклар ман байланыслы маьселе. Ана тилин, миллетлердинъ аьдет-йорыкларын саклав маьселеге де маьне беруьв керек. Соны ман, маьселелер аз тувыл. Дагестан етекшилигине дагестанлылардынъ яшав сапатлыгын ийгилендируьв бойынша республика алдында турган борышларды шешуьвде уьстинликлер йорайман, – деди ол.