Янъыларда ногай ясымыз спорт тармагындагы етимиси мен ногай халкынынъ коьнъилин коькке дейим коьтерди. Айтпага, 2025-нши йылдынъ курал айынынъ 2-4-нши куьнлеринде Красноярск каласында оьткен эркин куьрес бойынша яслар ара Россиядынъ Бириншилигинде ердесимиз Казманбет Батыров оьзининъ 52 килограмм шеккиси мен кызувлы турнирде куьндеслери мен тиресуьвли куьресип енъуьвши болды. Яс чемпионымыз Казманбет Батыров асылы ман Ногай районынынъ Нариман авылыннан. Спорт мастерининъ кандидаты Казманбет Батыров он йыллар бойы оьзининъ тренери Азамат Арсен увылы Кокоевтинъ етекшилиги астында сулыбын арттырып келеди.

Уьстимиздеги курал айынынъ 25-нши куьнинде элимиздинъ бас каласы Москвада енъуьвши ердесимизди эм онынъ тренери Азамат Арсен увылы Кокоевти Рашид Акказиевтинъ етекшилиги мен «Ногай ямагаты» организациясынынъ ваькиллери хош коьрип йолыктылар. Москва каласынынъ эм Москва областинде яшайтаган баьри ногайлар атыннан «Ногай ямагаты» регионаллык ямагат организациясы спортсменлерге эстелик савгаларын, баска болып, аьр бирисине 100 мынъ маьнет акшалай баргыларын тапшырды. Йолыгыс йылы дослык аьлде озды. Тренер Азамат Арсен увылы Кокоевтинъ соьзине коьре, Россия алдышылыгында Дагестаннынъ енъуьвге уьмитленген 69 яслардан тек эки спортсменлери алтын медальлерине тийисли болдылар. Сол зат Ногай районынынъ савлай мектеблерининъ эм тренерининъ тиресуьвли эм етимисли ислевининъ уьстинликли тамамы болады. Алдыда Подмосковьеде оьтеек Россия йыйылыс командалар тизимине йыйылысы аьзирленеди эм тезден Италия элининъ Каорле каласында эркин куьрес бойынша Европа чемпионаты озгарылаяк. Бу зат Дагестандагы Ногай районымыз уьшин бийик тарихли етисуьвлерининъ бириси. Казманбет Батыровты ярык енъуьви мен ак юректен кутлаймыз. Спортсменлеримизди карыжлав ягыннан коьтергишлеген баьри патриотларымызга да айырым разылыгымызды билдиремиз. Яс чемпионымызга келеекте де янъы етимислерди эм бийик етисуьвлерди йораймыз.
Суьвретте: яс чемпионга савга тапшырылув мезгили.