Ердеслеримиз элимиздинъ кызыксынувларын коршалав ниет пен, колларына савыт-садак алып, согыс спецоперацияда ортакшылык этип келедилер. Фронтта катнаскан аьр бир аьскершиди йигит деп санамага ыхтыярлымыз, неге десе олар енъуьв уьшин сонъына дейим бармага аьзир боладылар. Ердеслеримиздинъ йигитликлери, кайратлыклары уьйкен сыйга тийисли. Согыс спецоперация катнасувшылардынъ юзлерине карасымызды таслаганда, олардынъ коьзлеринде кыйналувларын сезбей болмаймыз. Олар элине суьйимди, алал дослыкты эм яшавды шынтылайын баалап уьйренгенлер. Аьскершилеримиз согыс урысларда оьз катнасувлары, авыр аьллеринде явга карсы тиресуьвли турганлары акында эскеруьвлери мен боьлисип келедилер. Сол тарихлер – тек согыс хроникасы тувыл, ол аьдемнинъ ян байлыгы куьшининъ де шайытлары. Согыс спецоперация катнасувшысынынъ карасы элди коршалап билуьв ол бек маьнели экени, тынышлы яшавдынъ, йогарымызда таза коьктинъ уьйкен баалыгы бар болганы акында эсимизге салады.
Элимиздинъ уьстинде кыйынлык тувганда, ол оьзининъ коршалавшыларынынъ ярдамында керексингенде, оны саклавга турган коьплеген увылларынынъ санында Алибек Валиев те шетте карап турмады. Аталыгынынъ алдында борыш, оьз элининъ кызыксынувларын коршалав Алибекти оьз сайлавын этпеге буйырды. Ол Тарумов районынынъ Новодмитриевка авылында тувган, биринши куьннен алып согыс спецоперацияда катнасады. Ерли мектебте билим алган шагында оьз тенълери арасында окувга ымтылыслыгы ман баскаланып келди. Спортка суьйими, боьтен де тайский бокска аваслыгы, яста яваплылыкты, шыдамлык касиетлерин тербиялады, олар сонъында Алибекке фронтта да керектилер. Тиресуьвли аьзирленуьвлер онынъ хасиетин беркитти, етимислерге аькелди. Оьз уьстинде каныгыслы куллык этуьви яска коьп кере Дагестан чемпионатларында енъмеге де амал берди. Баска болып, ол спорт устасы деген атына да тийисли болган. Спорт ногай ястынъ яшавында буьгуьнлерде де маьнели орынды алады. 9-ншы классты тамамлаган сонъ, 2019-ншы йыл Алибек Сургут каласындагы политехнический колледжинде автомеханикке окыйды. 2021-нши йыл окувды тамамлаган сонъ, Мурманск каласындагы айырым гвардиядынъ тенъиз пехота бригадасында кызмет кылады. 2022-нши йылдынъ навруз айыннан алып контракт бойынша Донецк областинде согыс спецоперацияда катнасып келеди. Буьгуьнлерде Новодмитриевка авыл орта мектебининъ выпускниги, йигит аьскерши мен онынъ окытувшылары, авылдаслары, ата-аналары, дослары да оьктемсийдилер. Согыс спецоперация ериннен уьйине кыска болжал тыншаювга кайтканда, Алибек тувган мектебинде конакта болып, окувшылар ман йолыгысып хабарламага да заман табады. Ол окувшылар ман службасында алган сулыбы ман боьлиседи, оьз согыс йолдаслары, борышлары акында, аьскерши тек физически ягыннан аьзир болып калмай, терен билимли, авыр аьллеринде тез аьрекетте токтасты алмага эм Элин коршалавга дайым аьзир болмага кереги акында тербиялав хабарларын юритеди.
Уьйинде аьскершиди суьйикли аьели, кардаш-тувганлары, авылдаслары енъуьв мен аман-эсен кайтканын саклайдылар. Биз аьскершилеримиздинъ йигитликлери, коркынышсызлыгы ман дайым оьктемсиймиз, сондай йигитлеримиз болган шаклы, Аталыгымыз сенимли колларда экенине шекленмеймиз.
Г.Нурдинова.
Суьвретте: Алибек Валиев.