Оьткен юмадынъ ишинде Ногай районымыздынъ Халк яратувшылык орталыгында Сраждин Батыров атындагы саниятлар мектебининъ окытувшылары, тербияланувшылары, олардынъ ата-аналары йыйылып, бу окув йылдынъ тамамланувына багысланган концерт оьткердилер.
Программа бойынша саниятлар мектебининъ анъ боьлигинде билим алатаган окувшылар оьз оьнерлерин коьрсеттилер. Концерт –олардынъ сав окув йылы
ишинде, оьзлерининъ специальностьлери бойынша кайтип терен билим алганларынынъ сапатын коьрсетеди. Яс талантлар туьрли жанрлы анъларды ойнадылар.
Ногай районы бойынша саниятлар мектебининъ етекшиси Анвар Аджибаев келген конакларды, тербияланувшыларын хош коьип алды, окув йылы ишинде уьстинликлерге етискен окытувшыларына оьз разылыгын билдирди эм тийисли савгаларын тапшырды: Алтын Акбердиева, Эльмира Толубаева, Сакинат Нур-
лубаева – Сый грамоталарга, Анжела Аджиева – Дагестан Республикасынынъ ат казанган маданият куллыкшысы, «Юлдузлар» атлы домбырашылар куьби (етекшиси Ралина Махмудова) «Коьримли» деген атка тийисли
болдылар.

Бу куьнги концерт программады окытувшылар Марина Оразбаева ман
Адильхан Менгласанов юриттилер.
Саният мектеби мен уйгынланган концерт бек ийги аьлде оьтти. Мен сонда шайыт болып, коьнъилим коьтерилип, ийги сезимлер мен кайттым. Шарадынъ барысында саниятлар мектебининъ суьврет ясав, театраллык классларынынъ окувшылары да белгилендилер. Оьткен окув йыл ишинде олар да республикалык кезекте оьткен шараларда катнасып, етимислерге етискенлер.
Ети йыл узагында Сраждин Батыров атындагы саниятлар мектебинде окып
билим алган тербияланувшыларга соны тамамлав аттестатлар тапшырылдылар. Сол выпускниклердинъ алдыларында энди ашык йоллар, олар уьйкен йигерлик пен армаганда кеспили музыкантлар, суьвретшилер болмага боладылар. Соны
тиледи Анвар Аджибаев те аттестатларды тапшыраяктан алдын, неге десе керек
бизге кеспили окытувшылар эм музыкантлар.
Г.Курганова.
Суьвретте: шара барысы